اسحاق ڈار کی ترک سرمایہ کاروں سے ملاقات، پاکستان میں سرمایہ کاری کی دعوت
- ملاقات میں وفاقی وزرائے بحری امور، توانائی، پیٹرولیم، نجکاری، آئی ٹی و ٹیلی کمیونیکیشن اور ترکیہ میں پاکستان کے سفیر بھی شریک تھے۔
نائب وزیراعظم اور وزیر خارجہ سینیٹر محمد اسحاق ڈار نے پاکستان ترکیہ بزنس کانفرنس کے موقع پر ترکیہ کے معروف کاروباری گروپ کوچ ہولڈنگ کے اعلیٰ عہدیداروں سے ملاقات کی، جس میں توانائی، مینوفیکچرنگ، کان کنی اور صنعتی سرمایہ کاری کے شعبوں میں تعاون بڑھانے اور دونوں ممالک کے درمیان اقتصادی شراکت داری کو مزید مضبوط بنانے پر تبادلہ خیال کیا گیا۔
ملاقات میں کوچ ہولڈنگ کے انرجی گروپ کے صدر یاگیز ایوب اولو، ڈیوریبل گڈز گروپ کے صدر پولات سین، آرچیلیک کے سی ای او جان دنچر، ایگاز کے سی ای او ملیح پویراض اور دمیر ایکسپورٹ کے سی ای او رمضان یون نے شرکت کی۔
اسحاق ڈار نے ترک کاروباری رہنماؤں کو پاکستان میں سرمایہ کاری کے لیے سازگار ماحول سے آگاہ کرتے ہوئے انہیں انفرادی یا مشترکہ منصوبوں کے ذریعے پاکستان کی متحرک معیشت میں سرمایہ کاری کرنے کی دعوت دی۔
کوچ ہولڈنگ ترکیہ کے بڑے کاروباری گروپوں میں شمار ہوتا ہے، جس کی تخمینی مالیت 25 ارب ڈالر ہے۔ گروپ کی انتظامیہ نے پاکستان میں سرمایہ کاری میں گہری دلچسپی کا اظہار کیا۔
ملاقات میں وفاقی وزرائے بحری امور، توانائی، پیٹرولیم، نجکاری، آئی ٹی و ٹیلی کمیونیکیشن اور ترکیہ میں پاکستان کے سفیر بھی شریک تھے۔
دریں اثنا، نائب وزیراعظم نے اویاک کے جنرل منیجر و سی ای او پروفیسر ڈاکٹر مراد یالچنتاش سے بھی ملاقات کی۔ اس موقع پر سرمایہ کاری میں اضافے، صنعتی تعاون کے فروغ اور پاکستان و ترکیہ کے درمیان اسٹریٹجک اقتصادی شراکت داری کے نئے مواقع پر گفتگو ہوئی۔
ڈاکٹر مراد یالچنتاش اور ان کے وفد نے پاکستان کی معاشی بہتری اور ترقی کو سراہتے ہوئے مختلف شعبوں میں سرمایہ کاری میں گہری دلچسپی ظاہر کی۔
بعد ازاں پاکستان۔ترکیہ بزنس کانفرنس سے خطاب کرتے ہوئے اسحاق ڈار نے کہا کہ پاکستان اور ترکیہ کے تعلقات ہمیشہ باہمی اعتماد، تعاون اور یکجہتی پر مبنی رہے ہیں۔ انہوں نے کہا کہ بدلتے ہوئے عالمی حالات اقتصادی تعاون کے نئے تقاضے سامنے لا رہے ہیں، اس لیے تجارت اور سرمایہ کاری کے فروغ کو خارجہ پالیسی کی ترجیحات میں شامل کرنا ناگزیر ہو چکا ہے۔
انہوں نے کہا کہ پاکستان میں کاروبار دوست ماحول کی فراہمی حکومت کی اولین ترجیح ہے اور حکومت انفارمیشن ٹیکنالوجی، معدنیات اور توانائی کے شعبوں میں سرمایہ کاری کا خیرمقدم کرتی ہے۔ اسحاق ڈار نے اس امید کا اظہار کیا کہ پاکستان اور ترکیہ مشترکہ اقتصادی تعاون کو فروغ دے کر اپنے عوام کے لیے مزید خوشحال مستقبل کی بنیاد رکھیں گے۔
کاپی رائٹ بزنس ریکارڈر، 2026