کوالیفائر ماجا چلنسکا فرنچ اوپن ٹینس کے سیمی فائنل میں پہنچ گئیں

پولینڈ کی 24 سالہ کوالیفائر کھلاڑی مایا چلنسکا نے فرنچ اوپن میں اپنی شاندار کارکردگی جاری رکھتے ہوئے روس کی انا کالنسکایا کو شکست دے کر سیمی فائنل کے لیے کوالیفائی کر لیا۔ انہوں نے کوارٹر فائنل میں 22 ویں سیڈ روس کی انا کالنسکایا کو 7-6 اور 6-3 سے ہرا کر یہ کامیابی حاصل کی۔ چلنسکا اوپن ایرا میں رولینڈ گیروس (فرنچ اوپن) کے سیمی فائنل میں پہنچنے والی تاریخ کی دوسری، جبکہ کسی بھی گرینڈ سلیم کے سیمی فائنل میں پہنچنے والی چھٹی کوالیفائر کھلاڑی بن گئی ہیں۔

ہفتے کو ہونے والے فائنل میں جگہ بنانے کے لیے اب ان کا مقابلہ ورلڈ نمبر ون آرینا سبالینکا یا روس کی ڈیانا شنائیڈر سے ہوگا۔ مایا چلنسکا کا کہنا تھا کہ وہ میچ کے دوران دباؤ اور تناؤ کا شکار تھیں لیکن انہوں نے صرف اپنے کھیل پر توجہ مرکوز رکھی۔ وہ ہر میچ جیتنے کی کوشش کر رہی ہیں اور اس کامیابی پر بیحد خوش ہیں۔