آبنائے ہرمز کھولنے کے معاہدے کی امیدیں، ڈالر کی قدر میں کمی

ڈالر پیر کو ایشیائی مارکیٹ کے آغاز پر کمزور ہو گیا کیونکہ آبنائے ہرمز کو دوبارہ کھولنے کے معاہدے کی امیدوں نے خام تیل کی قیمتیں 100 ڈالر فی بیرل سے نیچے کر دیں، تاہم ٹرمپ انتظامیہ نے ایران کے ساتھ جلد معاہدے کے امکانات کو کم اہم قرار دیا ہے۔

جاپانی ین کے مقابلے میں امریکی ڈالر 0.2 فیصد کمی کے ساتھ 158.87 ین پر آگیا، جبکہ یورو 0.3 فیصد بڑھ کر 1.1642 ڈالر اور برطانوی پاؤنڈ 0.4 فیصد اضافے کے ساتھ 1.3485 ڈالر تک پہنچ گیا۔

عالمی مارکیٹوں میں پیر کے روز کئی ممالک میں تعطیلات کے باعث کاروباری سرگرمیاں محدود رہیں جس سے لیکویڈیٹی بھی کم رہی۔ آسٹریلوی ڈالر 0.4 فیصد اضافے کے ساتھ 0.7160 ڈالر اور نیوزی لینڈ کا ڈالر 0.5 فیصد بڑھ کر 0.5877 ڈالر پر ٹریڈ ہوا۔

ویسٹ پیک کے تجزیہ کاروں کے مطابق ابتدائی ایشیائی ٹریڈنگ میں ڈالر پر دباؤ دیکھا گیا جبکہ رسک کرنسیز، خاص طور پر آسٹریلوی ڈالر، بہتر کارکردگی دکھا رہے ہیں۔

ادھر ہفتے کے اختتام پر مشرق وسطیٰ میں امن معاہدے سے متعلق امیدیں غیر یقینی رہیں۔ امریکی صدر ڈونلڈ ٹرمپ نے کہا کہ ایران کے ساتھ امن معاہدے سے متعلق ایک مفاہمتی یادداشت بڑی حد تک طے پا چکی ہے، جس میں دونوں ممالک اور ثالثوں کی جانب سے پیش رفت رپورٹ کی گئی ہے۔

تاہم ٹرمپ نے واضح کیا کہ آبنائے ہرمز میں ایرانی بحری جہازوں پر امریکی پابندیاں معاہدہ طے پانے تک برقرار رہیں گی۔ ایران کی حکومت کی جانب سے فوری ردعمل سامنے نہیں آیا۔

تیل کی عالمی منڈیوں میں بھی کمی دیکھی گئی، برینٹ کروڈ 5.1 فیصد کمی کے بعد 98.29 ڈالر فی بیرل اور امریکی ویسٹ ٹیکساس انٹرمیڈیٹ 5 فیصد کمی کے بعد 91.76 ڈالر فی بیرل پر آگیا۔

تجزیہ کاروں کے مطابق مارکیٹیں اب بھی کسی حتمی معاہدے کے بارے میں محتاط ہیں۔ بٹ کوائن 0.6 فیصد اضافے کے ساتھ 77,043.60 ڈالر جبکہ ایتھر 0.4 فیصد بڑھ کر 2,099.77 ڈالر پر ٹریڈ ہوا۔