متحدہ عرب امارات کی سوڈان ایئرپورٹ حملے میں ملوث ہونے کی تردید

متحدہ عرب امارات نے سوڈان کے اس الزام کو مسترد کر دیا ہے کہ خرطوم ایئرپورٹ پر حملے میں اماراتی ڈرون استعمال کیا گیا، جو مبینہ طور پر ایتھوپیا سے اڑا تھا۔ یہ بیان ایک اماراتی عہدیدار نے منگل کی شب جاری کیا۔

سوڈان طویل عرصے سے امارات پر نیم فوجی گروپ ریپڈ سپورٹ فورسز کی حمایت کا الزام عائد کرتا رہا ہے، جو گزشتہ تین سال سے سوڈانی فوج کے خلاف خانہ جنگی میں مصروف ہے۔ امارات ان الزامات کی تردید کرتا رہا ہے اور کہتا ہے کہ وہ اس تنازع کے خاتمے کا خواہاں ہے۔

پیر کو سوڈانی فوج کے ترجمان نے دعویٰ کیا تھا کہ اماراتی حمایت میں اضافہ ہوا ہے، اور ایسی تصاویر و فلائٹ روٹس پیش کیے جن کے مطابق اماراتی ملکیت کے ڈرونز نے ایتھوپیا کے شہر باہر دار سے اڑان بھر کر مارچ اور مئی میں سوڈان کے مختلف مقامات کو نشانہ بنایا۔ تاہم اس معلومات کی آزادانہ تصدیق نہیں ہو سکی۔

سوڈانی حکام نے اس مبینہ خلاف ورزی پر ردعمل دینے کا عندیہ بھی دیا ہے۔ اماراتی عہدیدار کے مطابق یہ الزامات حقائق سے ہٹ کر ہیں اور ذمہ داری سے بچنے کی کوشش ہیں، جن کا مقصد جنگ کو طول دینا اور امن عمل میں رکاوٹ ڈالنا ہے۔

دوسری جانب ایتھوپیا نے بھی ان الزامات کی تردید کی ہے۔ جبکہ مصر اور سعودی عرب نے خرطوم ایئرپورٹ پر حملے کی مذمت کرتے ہوئے ہمسایہ ممالک کو مداخلت سے باز رہنے کی تنبیہ کی ہے۔

یاد رہے کہ سوڈان میں خانہ جنگی فوج اور آر ایس ایف کے درمیان اختلافات کے بعد شروع ہوئی تھی، جس کے نتیجے میں ملک شدید بحران کا شکار ہے۔