پاکستان نیوی نے بحیرۂ عرب میں پھنسے غیر ملکی جہاز کو ریسکیو کرلیا، بھارتی عملہ سوار تھا
- آئی ایس پی آر کا کہنا ہے کہ بھارتی جہاز ایم وی گوتم، جو عمان سے بھارت جا رہا تھا، دورانِ سفر فنی خرابی کا شکار ہوا
آئی ایس پی آر نے کہا ہے کہ پاکستان نیوی نے منگل کے روز بحیرۂ عرب میں پھنسے ہوئے ایک غیر ملکی عملے کے حامل بحری جہاز کو کامیاب ریسکیو آپریشن کے ذریعے بچا لیا، کیونکہ اس جہاز کو شدید فنی خرابی کا سامنا کرنا پڑا تھا۔
جہاز، جس کی شناخت ایم وی گوتم کے طور پر ہوئی ہے، عمان سے بھارت جا رہا تھا کہ دورانِ سفر اس میں خرابی پیدا ہو گئی اور وہ سمندر میں بے یار و مددگار ہو گیا۔ جہاز پر سات افراد موجود تھے جن میں چھ بھارتی اور ایک انڈونیشی شہری شامل تھے۔
بھارت کے میری ٹائم ریسکیو کوآرڈینیشن سینٹر ( ایم آر سی سی) ممبئی کی جانب سے موصول ہونے والی ہنگامی اطلاع پر پاکستان نیوی نے فوری ردعمل دیتے ہوئے پی ایم ایس اے جہاز کشمیر کو جائے وقوعہ کی طرف روانہ کیا۔
عملے کو خوراک، طبی امداد اور تکنیکی معاونت فراہم کی گئی تاکہ ضروری نظام بحال کیا جا سکے اور ان کی حفاظت یقینی بنائی جا سکے۔
نیوی نے کہا کہ یہ آپریشن پاکستان کے بحری سلامتی اور انسانی ہمدردی کے فرائض سے وابستگی کو ظاہر کرتا ہے، اور یہ امداد جہاز میں موجود افراد کی قومیت سے قطع نظر فراہم کی گئی۔