افغان سرحد پر دراندازی کی کوشش ناکام، 13 دہشت گرد ہلاک، آئی ایس پی آر

فوج کے شعبہ تعلقاتِ عامہ (آئی ایس پی آر) نے جمعرات کو بتایا ہے کہ پاکستان کی سکیورٹی فورسز نے شمال مغربی صوبہ خیبر پختونخوا میں پاکستان اور افغانستان کی سرحد کے ساتھ دو الگ الگ کارروائیوں کے دوران دراندازی کی کوشش ناکام بناتے ہوئے 13 دہشت گردوں کو ہلاک کر دیا ہے۔

آئی ایس پی آر کے مطابق یہ واقعات 28 اور 29 اپریل کو مہمند اور شمالی وزیرستان کے اضلاع میں پیش آئے۔

پہلی کارروائی مہمند میں کی گئی جہاں سکیورٹی فورسز نے دہشت گردوں کے ایک گروہ کی نقل و حرکت کو بروقت شناخت کیا جو پاکستان میں داخل ہونے کی کوشش کر رہا تھا۔ مؤثر کارروائی کے دوران فورسز نے فائرنگ کے تبادلے میں آٹھ دہشت گردوں کو ہلاک کر دیا۔

آئی ایس پی آر نے بتایا ہے کہ شمالی وزیرستان میں ایک الگ واقعے میں دراندازی کی ایک اور کوشش ناکام بنائی گئی، جہاں شدید فائرنگ کے تبادلے کے بعد پانچ دہشت گرد ہلاک ہو گئے۔

آئی ایس پی آر کے مطابق ان علاقوں میں سینیٹائزیشن آپریشنز جاری ہیں تاکہ کسی بھی باقی ماندہ دہشت گرد کا خاتمہ کیا جا سکے۔

بیان میں کہا گیا ہے کہ سکیورٹی فورسز ملک کی سرحدوں کے دفاع کے لیے پرعزم ہیں اور “عزمِ استحکام” مہم کے تحت انسدادِ دہشت گردی کارروائیاں جاری رکھیں گی تاکہ ان کے بقول غیر ملکی سرپرستی میں ہونے والی دہشت گردی کا خاتمہ کیا جا سکے۔