عمر خالد این سی اے اے آل کانفرنس اعزاز حاصل کرنے والے پہلے پاکستانی گولفر بن گئے

پاکستانی گولفر عمر خالد حسین نے امریکہ میں منعقدہ 2026 میسوری ویلی کانفرنس مینز گولف چیمپئن شپ میں تیسری پوزیشن حاصل کر کے تاریخ رقم کر دی۔

وہ این سی اے اے ڈویژن آئی آل کانفرنس ٹیم میں شامل ہونے والے پہلے پاکستانی کھلاڑی بن گئے ہیں۔ یونیورسٹی آف ایونز ویل کی نمائندگی کرتے ہوئے عمر نے الینوائے کے اینبرائر گولف کلب میں شاندار کارکردگی دکھائی اور 54 ہولز کا ایونٹ مجموعی طور پر بہترین اسکور کے ساتھ مکمل کیا۔

عمر خالد کے کیریئر میں یہ ایک اور بڑا سنگ میل ہے۔ اس سے قبل ستمبر 2025 میں وہ امریکی سرزمین پر کوئی ٹائٹل (فینڈرچ اوپن) جیتنے والے پہلے پاکستانی بنے تھے۔ وہ ایشین گیمز اور ورلڈ ایمیچر ٹیم چیمپئن شپ میں بھی ملک کی نمائندگی کر چکے ہیں۔ محض 16 سال کی عمر میں نیشنل ایمیچر چیمپئن بننے والے عمر خالد ’ورلڈ ایمیچر گولف رینکنگ‘ کے ٹاپ 10 میں جگہ بنانے والے پہلے پاکستانی بھی ہیں۔ ان کی یہ حالیہ عالمی کامیابی پاکستانی گولف کے روشن مستقبل کی عکاسی کرتی ہے۔