چین کا ایرانی جہاز قبضے میں لینے پر اظہار تشویش

چین نے امریکی فوج کی جانب سے ایرانی پرچم بردار کارگو جہاز کو روکنے اور قبضے میں لینے کے اقدام پر تشویش کا اظہار کیا ہے اور متعلقہ فریقین سے جنگ بندی معاہدے کی ذمہ داری کے ساتھ پاسداری کرنے کی اپیل کی ہے۔

چینی وزارتِ خارجہ کے ترجمان گوئو جیاکُن نے پیر کے روز معمول کی پریس بریفنگ میں کہا کہ آبنائے ہرمز کی صورتحال نہایت حساس اور پیچیدہ ہے۔ انہوں نے زور دیا کہ تمام فریق کشیدگی میں مزید اضافے سے گریز کریں اور ایسے حالات پیدا کریں جن سے اس اہم آبی گزرگاہ میں بحری آمد و رفت معمول پر آ سکے۔

اس سے قبل امریکہ نے کہا تھا کہ اس نے ایک ایرانی کارگو جہاز پر فائرنگ کر کے اسے اپنی تحویل میں لے لیا، جو ایرانی بندرگاہوں پر عائد امریکی ناکہ بندی کو عبور کرنے کی کوشش کر رہا تھا۔

دوسری جانب ایران کی فوج نے دعویٰ کیا کہ مذکورہ جہاز چین سے سفر کر رہا تھا اور اس نے امریکی کارروائی کو مسلح قزاقی قرار دیتے ہوئے اس کے خلاف جوابی کارروائی کا عزم ظاہر کیا ہے۔

ماہرین کے مطابق آبنائے ہرمز میں جاری کشیدگی عالمی تجارت اور توانائی سپلائی کے لیے خطرہ بن سکتی ہے، جس کے باعث عالمی برادری اس صورتحال پر گہری نظر رکھے ہوئے ہے۔