رہنماؤں کے لیے تجسس کیوں ضروری ہے؟

کیا لوگ واقعی نوکریاں چھوڑ دیتے ہیں؟ ایک معروف مگر گھِسی پٹی کہاوت ہے کہ ”لوگ ادارے نہیں بلکہ اپنے مینیجرز کو چھوڑتے ہیں۔“ اگرچہ اس میں کچھ سچائی ہو سکتی ہے، تاہم اس پیشہ ورانہ مسئلے کو اس زاویے سے آگے بڑھ کر دیکھنا بھی ضروری ہے۔ غیر مطمئن ملازمین کے ساتھ میری متعدد نشستوں کے دوران کچھ دلچسپ تبصرے بار بار سننے کو ملے: ”وہ خود کو سب کچھ جاننے والا سمجھتا ہے“۔ ”وہ مجھے احمق اور نااہل محسوس کراتا ہے“۔ ”جب بھی میں کوئی جواب پیش کرتا ہوں، وہ فوراً اپنی کہانی سنانا شروع کر دیتا ہے“۔”چھ افراد کی میٹنگ میں بھی مجھے یوں لگتا ہے جیسے وہاں صرف ایک ہی شخص موجود ہو۔“

یہ تبصرے ایک تشویشناک رجحان کی نشاندہی کرتے ہیں: دوسروں پر حاوی ہونے کا رجحان، حد سے زیادہ غالب آنے کی خواہش، اور تجسس سے عاری رویہ۔ اس رجحان کے نتیجے میں لوگوں کو شامل کرنے اور انہیں مؤثر انداز میں متحرک رکھنے کی صلاحیت بری طرح متاثر ہوتی ہے۔ یہ ایک سنجیدہ مسئلہ ہے۔

رہنما تجسس کو اپنانے میں ہچکچاہٹ کیوں محسوس کرتے ہیں؟ اس کی دو بنیادی وجوہ ہیں۔ پہلی وجہ اس کا اس پرانی کہاوت سے جڑ جانا ہے کہ ”تجسس بلی کو مار دیتا ہے“ یعنی حد سے زیادہ تجسس نقصان دہ ہو سکتا ہے؛ اور یہ تاثر عام ہے کہ زیادہ تجسس رکھنے والا شخص بچگانہ یا حد سے زیادہ ٹوہ لینے والا سمجھا جاتا ہے۔

اسی لیے رہنما عموماً خود کو متجسس افراد کے طور پر پہچانے جانے کے خواہش مند نہیں ہوتے۔ وہ خود کو ماہر سمجھتے ہیں جو بڑی تصویر واضح کرنے، رہنمائی فراہم کرنے اور مشورہ دینے کے لیے موجود ہوتے ہیں۔ ان کے نزدیک تجسس بعض اوقات ایک کمزوری محسوس ہوتا ہے جو ان کے علم یا مہارت میں کمی کو بے نقاب کر سکتا ہے۔ دوسری وجہ یہ ہے کہ بہت سے رہنما واقعی اپنی ہی آواز سننے میں لطف محسوس کرتے ہیں اور کھوج لگانے کے بجائے بیان کرنے کو ترجیح دیتے ہیں۔ اس دوسری قسم کے رہنما خاصے عام ہیں۔

آپ کو صرف یہ دیکھنا ہے کہ وہ میٹنگز کیسے چلاتے ہیں یا تقاریر کیسے کرتے ہیں۔ ان کے پاس کہنے کو بہت کچھ ہوتا ہے۔ ان کی گفتگو وقت سے آگے نکل جاتی ہے۔ انہیں سامعین کی عدم دلچسپی کا احساس تک نہیں ہوتا۔ موضوع ختم کرنے کے بعد بھی وہ بولتے چلے جاتے ہیں۔ آخر میں سامعین کا شکریہ ادا کرتے ہیں مگر پھر بھی گفتگو سمیٹنے سے گریز کرتے ہیں۔ یہ سب ایک ایسے ذہن کی واضح اور خطرناک نشانیاں ہیں جو اپنی ہی سوچوں سے اس قدر لبریز ہو کہ اس میں کسی اور خیال کے لیے جگہ باقی نہ رہے۔ یہی وہ صورت حال ہے جب رہنما اپنے عہدے کی برتری کے احساس کا شکار ہو جاتے ہیں۔

تاہم، یہی رویہ اکثر ان کی ترقی میں رکاوٹ بن جاتا ہے۔ تجسس صرف دوسروں کے معاملات میں ٹوہ لینے یا جھانکنے تک محدود نہیں ہے۔ بلکہ یہ ذہنی نشوونما کی جڑ ہے۔ چند وجوہات جن کی بنا پر تجسس پائیدار قیادت کی پہچان بن جاتا ہے، درج ذیل ہیں:

تجسس کا پہلا فائدہ : دلچسپی پیدا کرنا
غیر متجسس رہنما بھی دلچسپی رکھتے ہیں، مگر زیادہ تر اپنے بارے میں۔ وہ اپنی سوانح عمری اور کامیابیوں سے اس قدر بھرے ہوتے ہیں کہ دوسروں میں دلچسپی لینا کم ہی ہوتا ہے۔ جب رہنما تجسس رکھتے ہیں، تو وہ دوسروں اور دیگر امور میں دلچسپی لیتے ہیں۔ وہ لوگوں کو غور سے دیکھتے ہیں، نہ صرف بیان کرتے ہیں بلکہ دوسروں کی دلچسپیوں کو سمجھنے کے لیے بھی تیار رہتے ہیں۔ خودغرض رہنما بورنگ بن جاتے ہیں، لوگ بہ ظاہر دلچسپی دکھاتے ہیں مگر دل سے نہیں لیتے۔

جب لوگ دوسروں میں دلچسپی لیتے ہیں، تو دوسرے بھی ان میں دلچسپی لیتے ہیں۔ ایسے رہنما مشکل اسٹیک ہولڈرز کے ساتھ رابطہ قائم کرنے میں ماہر ہوتے ہیں۔ ایسے رہنما ایک خوشگوار اور دلکش شخصیت کا تاثر پیدا کرتے ہیں۔

تجسس کا دوسرا فائدہ: جدت و اختراع کی طرف رہنمائی
ایک سب سے بڑا فائدہ یہ ہے کہ تجسس نئے خیالات کی طرف لے جاتا ہے۔ تجسس دریافت میں مدد دیتا ہے۔ تجسس جستجو میں معاون ہے۔ تجسس اختراع میں راہ ہموار کرتا ہے۔ تجسس رکھنے والے رہنما سیکھنے کے لیے زیادہ کھلے ذہن والا ہوتے ہیں، سننے کے لیے زیادہ تیار رہتے ہیں، اور تبدیلی کے لیے زیادہ کھلے ذہن کے حامل ہوتے ہیں۔

میں نے ذاتی طور پر یہ اے آئی کے نفاذ کے معاملے میں دیکھا ہے: ایک ایسا رہنما جو انتہائی ذہین اور تکنیکی طور پر ماہر ہے، اپنی کمپنی میں اے آئی کو قبول نہیں کرا پا رہا کیونکہ وہ لوگوں کے ذہنوں میں موجود غیر یقینی صورتحال کو سمجھنے میں دلچسپی نہیں رکھتا۔ جبکہ دوسرا رہنما، جو تکنیکی طور پر شاید اتنا ماہر نہیں لیکن سیکھنے کا جذبہ رکھتا ہے، وقت لگا کر اے آئی کے بارے میں مزید معلومات حاصل کر رہا ہے اور لوگوں کی رائے سن رہا ہے، وہ پہلے ہی اپنی کمپنی میں اے آئی کی قبولیت کے لیے راہ ہموار کر رہا ہے۔

تجسس کا تیسرا فائدہ: شمولیت پیدا کرنا

شاید تجسس رکھنے کا سب سے بڑا فائدہ یہ ہے کہ یہ فطری طور پر دوسروں کو شامل کرنے کا ذریعہ بنتا ہے۔ جیسے ہی آپ لوگوں سے سوالات کرنا شروع کرتے ہیں، وہ دلچسپی لینے اور حصہ لینے لگتے ہیں۔ میٹنگ میں بس ایک چھوٹا سا تجربہ کریں: تعلق قائم کرنے کے بجائے سوالات کریں۔ ماحول بدل جائے گا، انگیجمنٹ کے درجات بڑھ جائیں گے، لوگ متحرک ہوں گے، اور توانائی مثبت محسوس ہوگی۔

تاہم، تجسس بھی آسان نہیں۔ اگر صحیح طریقے سے نہ کیا جائے تو یہ الٹا اثر ڈال سکتا ہے۔ تجسس رکھنے والے رہنما کے لیے کچھ بنیادی اصول یاد رکھنا ضروری ہیں:

نیت سب سے پہلے، ”کیوں“ اہم ہے
متجسس ہونے کی نیت کا براہِ راست اثر نتیجے پر پڑتا ہے۔ اگر مقصد مزید سیکھنا اور جاننا ہو، تو گفتگو میں اسی طرح کا مثبت لہجہ اور ارتکاز ہوگا۔ اگر مقصد کسی کو برا دکھانا ہو تو طنز تجسس پر حاوی ہو جائے گا۔ کئی بار لوگ میرے پاس آ کر بتاتے ہیں کہ جب ان کے مینیجر نے معلومات دینے کو کہا، تو وہ کتنے بے چین ہوئے کیونکہ لہجے میں طنز واضح تھا۔ واضح رہے کہ کسی اور کو علم و مہارت کا موقع دینے سے پہلے اپنی نیت واضح کر لیں۔

سوچنے والے سوالات پوچھیں
صحیح سوال صحیح انداز میں پوچھنا ایک مہارت ہے جس کی مشق ضروری ہے۔ سوچ کو ابھارنے والے سوالات پوچھیں، جیسے:“ ”آپ کا یہ خیال بہت متاثر کن ہے، کیا آپ مزید تفصیل بتا سکتے ہیں؟“ ” ہمیں کون سے خلا پر توجہ دینے کی ضرورت ہے؟“، ”اگر بجٹ کافی نہ ہو تو کیا ممکنہ حل ہو سکتے ہیں؟“

غلط سوالات پوچھنے سے یہ عمل تفتیش جیسا محسوس ہو سکتا ہے اور دوسرا فرد بے دل ہو جائے گا۔

سیشن کا انتظام کریں
اگر بات چیت میں ایک سے زیادہ افراد شامل ہوں، تو اپنی حیثیت موڈریٹر کی رکھیں۔ یقینی بنائیں کہ ہر کسی کو اپنی رائے دینے کا موقع ملے۔ ان کی رائے کا خلاصہ کریں اور اگلے فرد کے لیے تعلق جوڑنے والا سوال پوچھیں۔ مقصد یہ ہے کہ تمام شرکاء سوچیں، ربط قائم کریں اور تجاویز پیش کریں۔ موڈریٹر کے طور پر سوالات ایسے ہونے چاہئیں جو لوگوں کو صرف اپنی خلا کی نشاندہی نہیں کرنے بلکہ عملی حل تجویز کرنے کے قابل بنائیں۔

انسان اور دیگر مخلوقات میں سب سے بڑا فرق یہ ہے کہ انسان سوال کرنے کی صلاحیت رکھتا ہے: کیوں، کیوں نہیں، کیا، کیسے وغیرہ۔ یہ اور کئی دیگر سوالات اللہ کی سب سے بڑی نعمت، یعنی سوچنے اور انتخاب کرنے کی قابلیت، کی بدولت انسان میں پیدا ہوتے ہیں۔ تمام اختراعات اور ایجادات اس وقت جنم لیتی ہیں جب تجسس دریافت اور جستجو کی راہ ہموار کرتا ہے۔ ترقی پذیر معاشروں، کمپنیوں اور ممالک میں تنقیدی سوچ کے کردار کو نظر انداز نہیں کیا جا سکتا۔

جب آئن اسٹائن سے کہا گیا کہ آپ نابغہ ہیں، تو انہوں نے جواب دیا کہ ”نہیں، میں کوئی نابغہ نہیں ہوں، میری کوئی خاص صلاحیت نہیں ہے۔ میں صرف شدید تجسس کا حامل ہوں۔“

کاپی رائٹ بزنس ریکارڈر، 2026