بونڈائی بیچ فائرنگ کا ملزم پہلی بار عدالت میں پیش

آسٹریلیا کے شہر سڈنی کے معروف بونڈائی بیچ پر یہودی تہوار ہنوکا کی تقریب کے دوران فائرنگ کر کے 15 افراد کو ہلاک کرنے کے الزام میں گرفتار ملزم پہلی بار پیر کے روز عدالت میں پیش ہوا۔ آسٹریلوی میڈیا کے مطابق 24 سالہ نوید اکرم پر 14 دسمبر کے حملے کے سلسلے میں مجموعی طور پر 59 الزامات عائد کیے گئے ہیں، جن میں قتل کے 15، قتل کی نیت سے زخمی کرنے کے 40 اور دہشت گردی کا ایک الزام شامل ہے۔

پولیس کا دعویٰ ہے کہ اس نے یہ حملہ اپنے 50 سالہ والد ساجد کے ساتھ مل کر کیا، جو واقعے کے دوران پولیس کی فائرنگ سے ہلاک ہو گئے تھے۔

پیر کو سڈنی کی عدالت میں مختصر سماعت کے دوران نوید اکرم نے گولبرن کریکشنل سینٹر سے ویڈیو لنک کے ذریعے شرکت کی، جہاں وہ ریمانڈ پر قید ہے۔ عدالتی کارروائی کے دوران وہ زیادہ تر خاموش رہا اور صرف اس بات کی تصدیق کے لیے بولا کہ اس نے متاثرین کی تفصیلات سے متعلق اشاعت پر پابندی بڑھانے کی بحث سنی ہے۔

عدالت کے باہر اس کے وکیل بین آرچبولڈ نے بتایا کہ ان کا مؤکل جیل کی سخت شرائط کے باوجود بہتر رہنے کی کوشش کر رہا ہے۔ انہوں نے کہا کہ ابھی یہ کہنا قبل از وقت ہے کہ وہ کس نوعیت کی درخواستِ جرم داخل کرے گا۔ مقدمے کی آئندہ سماعت اپریل میں متوقع ہے۔