پاکستان اور لیبیا کے درمیان علاقائی سلامتی اور دفاعی تعاون پر تبادلۂ خیال

لیبیا کی عرب مسلح افواج کے کمانڈر انچیف فیلڈ مارشل خلیفہ ابو القاسم حفتر نے لیبیا کے وزیر اعظم ڈاکٹر اسامہ سعد حماد کے ہمراہ پیر کو جنرل ہیڈ کوارٹرز (جی ایچ کیو) میں چیف آف آرمی اسٹاف اور چیف آف ڈیفنس اسٹاف فیلڈ مارشل سید عاصم منیر سے ملاقات کی ہے۔

انٹر سروسز پبلک ریلیشنز (آئی ایس پی آر) کے مطابق ملاقات میں باہمی دلچسپی کے امور، بالخصوص علاقائی سلامتی کی صورتحال اور پاکستان و لیبیا کے درمیان پیشہ ورانہ اور دفاعی تعاون کے امکانات، پر تبادلۂ خیال کیا گیا۔

دونوں فریقین نے دونوں ممالک کی مسلح افواج کے درمیان پائیدار روابط اور تعاون کی اہمیت پر زور دیا۔

فیلڈ مارشل سید عاصم منیر نے معزز مہمانوں کا خیرمقدم کیا اور لیبیا کے ساتھ دوطرفہ تعلقات کو مزید مضبوط بنانے کے لیے پاکستان کے عزم کا اعادہ کیا۔

آئی ایس پی آر کے مطابق انہوں نے لیبیا میں امن، استحکام اور ادارہ جاتی ترقی کے لیے پاکستان کی حمایت کا بھی اعادہ کیا۔

ملاقات خوشگوار اور تعمیری ماحول میں منعقد ہوئی، جو دونوں ممالک کے درمیان دیرینہ دوستانہ تعلقات کی عکاس ہے۔

اس سے قبل نور خان ایئر بیس پر آمد کے موقع پر فیلڈ مارشل حفتر کا استقبال فیلڈ مارشل سید عاصم منیر نے کیا۔

لیبیا کی مسلح افواج کے سربراہ نے جی ایچ کیو میں یادگارِ شہداء پر پھولوں کی چادر چڑھا کر شہداء کو خراجِ عقیدت بھی پیش کیا۔