جنوری میں مہنگائی کی شرح 5 سے 6 فیصد رہنے کا امکان، وزارت خزانہ

وزارتِ خزانہ نے بتایا ہے کہ جنوری 2026 میں پاکستان میں مہنگائی کی شرح 5 سے 6 فیصد کی حد میں رہنے کی توقع ہے۔ آج جاری کی گئی ماہانہ اقتصادی اپ ڈیٹ اور آؤٹ لک جنوری 2026 میں وزارت نے کہا کہ بڑی صنعتوں (ایل ایس ایم) کی حوصلہ افزا کارکردگی اور دیگر اہم اشاریوں کی مدد سے پاکستانی معیشت مالی سال 2026 میں اپنی ترقی کی رفتار برقرار رکھنے کے لیے مضبوط پوزیشن میں ہے۔

رپورٹ کے مطابق یہ مثبت صورتحال دانشمندانہ پالیسیوں، جاری ساختی اصلاحات اور مہنگائی کے دباؤ میں کمی کی وجہ سے مانیٹری شرائط میں نرمی کا نتیجہ ہے۔ یہ رپورٹ ایک ایسے وقت میں سامنے آئی ہے جب اسٹیٹ بینک آف پاکستان نے رواں مالی سال کی دوسری ششماہی کے کچھ مہینوں میں مہنگائی 7 فیصد سے زائد رہنے کی پیش گوئی کی ہے۔

اسٹیٹ بینک کے گورنر جمیل احمد نے پیر کو 2026 کے مانیٹری پالیسی کمیٹی کے پہلے اجلاس کے بعد اعلان کیا کہ بینک نے اپنی بنیادی پالیسی ریٹ کو 10.5 فیصد پر برقرار رکھنے کا فیصلہ کیا ہے، کیونکہ معاشی سرگرمیاں توقع سے زیادہ تیزی سے بڑھ رہی ہیں جن کی قیادت مقامی شعبے کر رہے ہیں۔

علاوہ ازیں گورنر اسٹیٹ بینک نے معیشت کے بارے میں مثبت آؤٹ لک پیش کرتے ہوئے مالی سال 2026 کے لیے جی ڈی پی گروتھ کی پیش گوئی بڑھا کر 3.75 سے 4.75 فیصد کر دی ہے اور اشارہ دیا ہے کہ دسمبر 2026 کے آخر تک زرمبادلہ کے ذخائر 20.2 ارب ڈالر کی بلند ترین سطح تک پہنچ سکتے ہیں۔

پاکستان بیورو آف سٹیٹسٹکس کے اعداد و شمار کے مطابق دسمبر میں سی پی آئی میں ماہانہ بنیادوں پر 0.4 فیصد اور سالانہ بنیادوں پر 0.1 فیصد کمی ہوئی۔ وزارتِ خزانہ کی رپورٹ میں مزید کہا گیا ہے کہ بیرونی محاذ پر کرنٹ اکاؤنٹ خسارے میں رہنے کا امکان ہے، تاہم ترسیلاتِ زر کی بھرپور آمد اور آئی ٹی و سروسز کی برآمدات میں مستحکم کارکردگی بیرونی دباؤ کو سہارا دے گی۔

رپورٹ میں یہ بھی کہا گیا ہے کہ بہتر مالیاتی انتظام میکرو اکنامک استحکام میں تعاون جاری رکھے گا۔