ڈالر کے مقابلے میں روپیہ مزید مضبوط

انٹربینک مارکیٹ میں بدھ کو بھی ڈالر کے مقابلے میں روپے کی قدر میں بہتری کا سلسلہ رہا جس کے نتیجے میں ڈالر 280 روپے کی سطح سے 279 روپے کی سطح پر واپس آگیا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.97 روپے پر بند ہوا۔

یاد رہے کہ مقامی کرنسی منگل کو 280.00 روپے پر بند ہوئی تھی۔

بین الاقوامی سطح پر بدھ کو ایشیائی تجارت کے ابتدائی اوقات میں امریکی ڈالر کی قدر بحال ہو کر تقریباً ایک ماہ کی بلند ترین سطح پر پہنچ گئی۔ یہ اضافہ امریکہ میں صارفین کی قیمتوں کے اشاریہ (سی پی آئی) کے اعداد و شمار جاری ہونے کے بعد ہوا جو کہ بڑی حد تک توقعات کے مطابق رہے۔ اس سے ان توقعات کو تقویت ملی ہے کہ فیڈرل ریزرو اس ماہ کے آخر میں شرح سود کو برقرار رکھے گا، باوجود اس کے کہ وائٹ ہاؤس کی جانب سے شرح سود کم کرنے کے لیے غیر معمولی دباؤ ڈالا جا رہا ہے۔

امریکی ڈالر انڈیکس 0.3 فیصد اضافے سے 99.18 پر ریکارڈ کیا گیا۔ اس طرح پیر کو ہونے والے نقصانات کا ازالہ ہوا، جب امریکی صدر ڈونلڈ ٹرمپ نے فیڈ چیئرمین جیروم پاول کو فوجداری کارروائی کی دھمکی دی تھی۔

منگل کو عالمی مرکزی بینکوں کے سربراہان اور وال اسٹریٹ کے بڑے بینکوں کے چیف ایگزیکٹوز نے جیروم پاول کی حمایت میں بیانات دیے۔

منگل کو جاری ہونے والے اعدادوشمار کے مطابق امریکا میں دسمبر کے دوران صارف قیمتوں میں ماہانہ بنیاد پر 0.3 فیصد اضافہ ہوا۔ یہ اضافہ بالخصوص کرایوں اور خوراک کی قیمتوں میں اضافے کے باعث ہوا جبکہ نومبر میں حکومتی شٹ ڈاؤن کے باعث افراطِ زر کو مصنوعی طور پر کم کرنے والے اثرات بھی ختم ہونا شروع ہوگئے۔

ان اعدادوشمار کے بعد یہ توقعات مزید مضبوط ہوگئیں کہ فیڈرل ریزرو رواں ماہ شرحِ سود میں کوئی تبدیلی نہیں کرے گا۔ سی ایم ای گروپ کے فیڈ واچ ٹول کے مطابق فیڈ فنڈز فیوچرز اس بات کا 95.6 فیصد امکان ظاہر کررہے ہیں کہ امریکی مرکزی بینک 28 جنوری کو ختم ہونے والے اپنے آئندہ دو روزہ اجلاس میں شرحِ سود برقرار رکھے گا، جو ایک دن پہلے کی سطح کے برابر ہے۔