پاکستان کی ناکام فصل: منصوبہ بند بحران

پاکستان کا زرعی شعبہ محض اتفاقاً خراب کارکردگی کا شکار نہیں۔ یہ دانستہ پالیسی انتخاب، جمی ہوئی سیاسی گرفت اور فکری جمود کے باعث ناکامی سے دوچار ہے۔

ہم کسان کو رومانوی انداز میں پیش کرتے ہیں، مگر ایسے نظام کو برقرار رکھتے ہیں جو نااہلی کو ادارہ جاتی شکل دیتا ہے، ہمارے قیمتی ترین وسائل یعنی پانی کو ضائع کرتا ہے، مٹی کو بنجر بناتا ہے اور دیہی آبادی کو مستقل غربت کی دلدل میں دھکیل دیتا ہے۔ یہ بدانتظامی نہیں بلکہ قومی مستقبل کی کھلی تباہی ہے۔

اگر پاکستان واقعی معاشی بقا، بلکہ بحالی کو سنجیدگی سے لینا چاہتا ہے تو آئندہ ایک دہائی تک زرعی شعبے کو کم از کم سالانہ 10 فیصد کی شرح سے بڑھنا ہوگا۔ یہ کوئی بلند بانگ دعویٰ نہیں بلکہ سادہ حسابی ضرورت ہے۔ اس کے بغیر مجموعی جی ڈی پی کی رفتار سست رہے گی، غذائی مہنگائی گھریلو بجٹ کو کھاتی رہے گی اور دیہی مایوسی گہری ہوتی جائے گی، جو سماجی عدم استحکام کو جنم دے گی۔

المیہ یہی ہے اور موقع بھی، کہ حل سب کو معلوم ہیں، قابلِ برداشت لاگت کے حامل ہیں اور دسترس میں ہیں۔ صرف ان پر عملدرآمد کے عزم کی کمی رہی ہے۔

زرعی بحالی کے لیے قومی چارٹر

ہمیں وقتی اعلانات سے آگے بڑھ کر واضح، ناقابلِ سمجھوتہ پانچ سالہ قومی چارٹر پر متفق ہونا ہوگا، جس میں قابلِ پیمائش اہداف طے ہوں:

• فصلوں کی پیداوار: 25 فیصد اضافہ
• پانی کے استعمال میں بہتری: فی ایکڑ پانی کے استعمال میں 30 فیصد کمی
• بعد از برداشت نقصانات: اندازاً 35 فیصد سے کم کرکے 15 فیصد سے نیچے
• درآمدی بل: متبادل پیداوار کے ذریعے سالانہ 5 سے 7 ارب ڈالر کی بچت
• شعبے کی ترقی: 10 سے 12 فیصد کی مسلسل شرحِ نمو
• روزگار: 40 سے 50 لاکھ براہِ راست اور بالواسطہ ملازمتوں کا حصول

اس سے کم کوئی بھی اقدام دانستہ پالیسی ناکامی کے مترادف ہوگا۔

پیداواری صلاحیت: پیداوار کے خلا کا سامنا

گندم، چاول اور مکئی جیسی بنیادی فصلوں کی فی ایکڑ پیداوار عالمی معیارات سے 30 سے 60 فیصد کم ہے۔ یہ کسان کی صلاحیت کی عکاسی نہیں بلکہ ریاستی غفلت کا نتیجہ ہے۔ اس کے لیے ضروری ہے کہ:

• زرعی توسیعی خدمات کو ڈیجیٹل اور فعال بنایا جائے اور انہیں قابلِ پیمائش نتائج سے جوڑا جائے۔
• سبسڈی یافتہ زرعی مداخل تک رسائی کے لیے مٹی کے ٹیسٹ کو لازمی قرار دیا جائے۔
• فی ایکڑ ملکیت کے بجائے فی ایکڑ پیداوار میں بہتری کو انعام دینے والی اسمارٹ مراعات کے ذریعے عمومی سبسڈی کا خاتمہ کیا جائے۔

صرف 25 فیصد پیداواری اضافہ ہی زرعی جی ڈی پی میں سالانہ 3 سے 4 کھرب روپے کا اضافہ کر سکتا ہے۔

پانی: وہ بحران جسے اب نظرانداز نہیں کیا جا سکتا

پاکستان پانی کو امیر ملکوں کی طرح ضائع کرتا ہے مگر کاشت کاری غریب ملکوں جیسی ہے۔ سیاست زدہ ’مفت‘ پانی نے تباہ کن سیلابی آبپاشی کو فروغ دیا ہے۔ ایجنڈا واضح ہے:

• 25 فیصد زیرِ آبپاشی رقبے کو ڈرِپ اور اسپرنکلر نظام پر منتقل کیا جائے۔
• 50 فیصد زیادہ نقصان والے نہروں کو پختہ کیا جائے۔
• تمام تجارتی ٹیوب ویلز کی رجسٹریشن اور میٹرنگ کی جائے۔

یہ اصلاحات اتنا پانی بچا سکتی ہیں کہ 20 سے 30 لاکھ نئے ایکڑ زیرِ کاشت لائے جا سکیں، گرتی ہوئی زیرِ زمین آبی سطح کو مستحکم کیا جا سکے اور شعبے کی ترقی میں اندازاً دو فیصد پوائنٹس کا اضافہ ہو۔

میکانائزیشن: ملکیت نہیں، رسائی

زمین کے یکجا ہونے پر دہائیوں سے جاری بحث ایک مہنگی توجہ ہٹانے والی مشق ثابت ہوئی ہے۔ فوری ضرورت ملکیت نہیں بلکہ رسائی کی ہے۔

• 10 ہزار کسٹم ہائرنگ مراکز پر مشتمل قومی نیٹ ورک قائم کیا جائے۔
• ہر کھیت سے 10 کلومیٹر کے اندر پلانٹرز، ہارویسٹرز اور لیزر لینڈ لیولرز کی دستیابی یقینی بنائی جائے۔

اس سے نقصانات کم ہوں گے، بروقت کاشت ممکن ہوگی، پیداوار میں 15 سے 20 فیصد اضافہ ہوگا اور زرعی مشینری خدمات و لاجسٹکس میں ہنرمند دیہی روزگار کا نیا ماحولیاتی نظام تشکیل پائے گا۔

بیج: دھوکہ دہی کا خاتمہ

جعلی اور غیر معیاری بیج کسان کے خلاف ’’معاشی دہشت گردی‘‘ کے مترادف ہیں۔ زیرو ٹالرنس پالیسی کے لیے ضروری ہے کہ:

• 100 فیصد تصدیق شدہ بیجوں کی مکمل ٹریس ایبلٹی ہو۔
• موسمیاتی تبدیلیوں سے ہم آہنگ اور ہائبرڈ اقسام کو تیزی سے فروغ دیا جائے۔
• جہاں مقامی تحقیق پیچھے ہو، وہاں بہتر جینیات کی عملی اور کنٹرولڈ درآمد کی جائے۔

اس کے نتیجے میں بغیر ایک قطرہ اضافی پانی یا ایک انچ اضافی زمین استعمال کیے 20 سے 30 فیصد پیداوار میں اضافہ ممکن ہے۔

کولڈ چین: ضیاع سے دولت تک

پاکستان ہر سال پھلوں اور سبزیوں کی 15 سے 20 کھرب روپے مالیت ضائع کر دیتا ہے، یہ ایک بڑے پیمانے کا اسکینڈل ہے۔

• باغبانی کی پیداوار کے 50 فیصد کے لیے کولڈ اسٹوریج کی گنجائش بڑھائی جائے۔
• ہر بڑے پیداواری کلسٹر میں جدید پیک ہاؤسز قائم کیے جائیں۔
• ریفریجریٹڈ ٹرانسپورٹ کی حوصلہ افزائی کی جائے۔

یہ ’’آسان فائدہ‘‘ براہِ راست 7 سے 9 کھرب روپے جی ڈی پی میں اضافہ اور لاجسٹکس و ویلیو ایڈیشن میں 10 لاکھ ملازمتیں پیدا کر سکتا ہے۔

اسٹریٹجک کاشت اور ویلیو ایڈیشن: مانگیں نہیں، کمائیں

خشک علاقوں میں زیادہ پانی استعمال کرنے والی گنے کی کاشت روایت نہیں بلکہ معاشی اور ماحولیاتی بدانتظامی ہے۔ ضروری ہے کہ:

• ایسے 20 فیصد رقبے کو تیل دار اجناس، دالوں اور زیادہ قدر والی فصلوں میں منتقل کیا جائے۔
• سائنسی بنیادوں پر فصلوں کی زوننگ نافذ کی جائے۔
• پھلوں اور سبزیوں کی 30 فیصد مقامی پروسیسنگ کی جائے اور زرعی برآمدات کو دوگنا کرکے 8 سے 10 ارب ڈالر تک لے جایا جائے۔

نتیجتاً خوردنی تیل اور دالوں کی درآمدات پر اربوں ڈالر کی بچت، لاکھوں صنعتی ملازمتیں اور برآمدی آمدن سے مضبوط روپیہ ممکن ہوگا۔

حتمی نکتہ: اصلاحات یا ناقابلِ واپسی زوال

مجموعی طور پر یہ ایجنڈا قومی بحالی کا واضح خاکہ ہے، جو درج ذیل وعدے کرتا ہے:

• قومی جی ڈی پی کی شرحِ نمو میں اضافی 2.5 سے 3 فیصد
• معیشت میں سالانہ 6 سے 8 کھرب روپے کا اضافہ
• 40 سے 50 لاکھ نئی ملازمتیں
• کم اور مستحکم غذائی قیمتیں
• بیرونی انحصار میں کمی
• خوشحال دیہی معاشرہ

پاکستان کو مزید غیر ملکی قرضوں یا نصیحتوں کی ضرورت نہیں۔ اسے اس سیاسی جرات کی ضرورت ہے کہ وہ ان مفاداتی گروہوں کو بے نقاب کر کے ختم کرے جو موجودہ نظام سے فائدہ اٹھا رہے ہیں۔ ہمارا زرعی شعبہ ایک بار پھر قومی ترقی کا انجن بن سکتا ہے، مگر صرف اسی صورت میں جب ہم اس خود فریبی کو ترک کریں کہ معمولی اور تدریجی تبدیلیاں کافی ہوں گی۔

وقت تیزی سے گزر رہا ہے۔ زیرِ زمین پانی کی سطح نیچے جا رہی ہے۔ دیہی نوجوانوں کی ایک پوری نسل امید کھوتی جا رہی ہے۔

اب انتخاب اصلاحات اور جمود کے درمیان نہیں رہا۔ انتخاب اصلاحات اور ناقابلِ واپسی زوال کے درمیان ہے۔

کاپی رائٹ بزنس ریکارڈر، 2025