دوسری بین الاقوامی ایس ای او کانفرنس 15 دسمبر کو کراچی میں ہوگی

آئی ٹی ماہرین نے دوسری بین الاقوامی ایس ای او کانفرنس کی تعریف کی جس میں مارکیٹرز، کاروباری افراد، ایجنسیز، ٹیکنالوجی کے پیشہ ور اور عالمی برانڈز جو اے آئی دور میں ترقی کرنا چاہتے ہیں شرکت کریں گے۔

2025 کا ایڈیشن جو 15 دسمبر کو انوویسٹا انڈس آئی ٹی پارک، کراچی میں منعقد ہوگا، پاکستان کو اے آئی سے چلنے والی مارکیٹنگ اور تکنیکی جدت کا ابھرتا ہوا مرکز ثابت کرنے کا مقصد رکھتا ہے۔ کانفرنس کا مقصد ڈیجیٹل مارکیٹنگ، اے آئی سے چلنے والے ایس ای او (سرچ انجن آپٹیمائزیشن)، سرچ انٹیلیجنس اور عالمی ترقیاتی حکمت عملیوں کے ماہرین کو ایک ساتھ لانا ہے۔ بین الاقوامی مقررین، ٹیک جدت طراز اور صنعتی بااثر افراد ایس ای او مارکیٹنگ اور عالمی ڈیجیٹل رجحانات کے مستقبل کے بارے میں اپنے بصیرت بھری معلومات شیئر کریں گے۔

بزنس ریکارڈر سے گفتگو کرتے ہوئے ٹیکنالوجی کے تجربہ کار اور نیشنل انکیوبیشن سینٹر (این آئی سی) کراچی کے پروجیکٹ ڈائریکٹر سید اظفر حسین نے کہا کہ پاکستان کا ڈیجیٹل ایکو سسٹم اے آئی سے چلنے والی مارکیٹنگ کے ذریعے مواد کے معیار، رسائی اور انگیجمنٹ کو بہتر بنا کر ترقی کرسکتا ہے۔

انہوں نے کہا کہ ایجنٹک اے آئی جو پیچیدہ کاموں کو خود مختاری سے انجام دیتی ہے، تجربہ، مہارت، مستند ہونے اور قابل اعتماد ہونے جیسے ٹرسٹ سگنل کے ساتھ ساتھ منظم اور معیاری مواد بھی تخلیق کر سکتی ہے۔ پیشہ ور افراد کو تربیت دے کر اور اے آئی پر مبنی ایس ای او طریقوں کی حوصلہ افزائی کر کے، پاکستانی کمپنیاں عالمی ڈیجیٹل رجحانات سے ہم آہنگ ہو سکتی ہیں، بین الاقوامی کلائنٹس کو راغب کر سکتی ہیں اور قومی ڈیجیٹل معیشت کو مضبوط کر سکتی ہیں جبکہ سرچ انجنوں کو ذہین ایجنٹوں کے طور پر صارفین کے سوالات کا درست جواب دینے کا موقع ملتا ہے۔

انہوں نے کہا کہ یہ کانفرنس بالکل مناسب وقت پر منعقد ہو رہی ہے کیونکہ اے آئی اور ایجنٹک اے آئی کے دور میں ایس ای او ارتقاء پذیر ہے۔ یہ روایتی کی ورڈز سے آگے بڑھ کر صارف کے ارادے، مواد کی ساخت اور مشین پڑھنے کے قابل ڈیٹا پر مرکوز ہو رہا ہے، یہ ایونٹ پیشہ ور افراد کو یہ سکھانے میں مدد دے گا کہ کس طرح مواد کو انسانوں اور اے آئی دونوں کے لیے بہتر بنایا جائے اور مقامی ٹیلنٹ کو عالمی بہترین عملی طریقوں سے جوڑا جائے۔