اینٹی منی لانڈرنگ ایکٹ 2010، ایف ٹی او نے ایس او پی کی تشکیل تک جیولرز کے خلاف کارروائی سے روک دیا
فیڈرل ٹیکس محتسب (ایف ٹی او) نے فیڈرل بورڈ آف ریونیو (ایف بی آر) کو ہدایت کی ہے کہ وہ جیولرز کمیونٹی کے خلاف اینٹی منی لانڈرنگ ایکٹ 2010 کے تحت کسی بھی قسم کے زبردستی کے اقدامات سے گریز کرے، جب تک کہ محکمہ ٹیکس ایک واضح اسٹینڈرڈ آپریٹنگ پروسیجر (ایس او پی) تشکیل نہیں دیتا۔
یہ معاملہ ایس آر او 924(1)/2020 سے متعلق ہے جو ایف بی آر نے جیولرز کے خلاف منی لانڈرنگ کے مقدمات بنانے کے لیے جاری کیا تھا۔
نئے حکم نامے کے مطابق، ایف ٹی او نے جیولرز کے حق میں دائر ریویو پٹیشن منظور کرتے ہوئے قرار دیا کہ ایف بی آر کے ڈائریکٹوریٹ جنرل آف ڈی این ایف بی پیز کو درخواست گزار ایسوسی ایشن کو مکمل سماعت کا موقع فراہم کرنا ہوگا اور ایس او پیز کی تیاری کے دوران ان کے خدشات کو قانونی تقاضوں کے مطابق دور کیا جائے۔
ریویو پٹیشن میں پاکستان جیمز جیولرز ٹریڈ اینڈ ایکسپورٹرز ایسوسی ایشن نے مؤقف اپنایا کہ ایف ٹی او دفتر نے پہلے فیصلے میں اپنے دائرہ اختیار سے متعلق غلط تشریح کی تھی، حالانکہ شکایت کا مقصد کسی قانون یا ضابطے کی تشریح نہیں بلکہ ایف بی آر کے جاری کردہ ایس آر او کی اصلاح کی سفارش تھی، جو جیولرز کے لیے ہراسانی کا باعث بن چکا ہے۔
درخواست گزار کا مؤقف تھا کہ یہ معاملہ بدانتظامی کے زمرے میں آتا ہے، کیونکہ ایف بی آر نے بطور ریگولیٹر ایس آر او جاری کرتے وقت اسٹیک ہولڈرز سے مشاورت نہیں کی۔
دورانِ سماعت ایف بی آر کے نمائندوں نے بتایا کہ جیولرز ایسوسی ایشن کے ساتھ متعدد ملاقاتیں ہو چکی ہیں اور 23 مئی 2025 کو ایک وضاحت بھی جاری کی گئی تھی، تاہم ایسوسی ایشن اس سے مطمئن نہیں تھی۔ اس کے باوجود، ایف بی آر نے وعدہ کیا کہ وہ تمام شراکت داروں کے ساتھ مشاورت کے بعد ایس او پیز کی تیاری کرے گا تاکہ ملک بھر میں شفاف اور منصفانہ نظام نافذ کیا جا سکے۔
ایف ٹی او نے قرار دیا کہ درخواست گزار کے بعض نکات اچھی نیت پر مبنی ہیں جنہیں ایف بی آر کو سنجیدگی سے دوبارہ دیکھنا چاہیے۔ اس لیے ریویو پٹیشن منظور کرتے ہوئے ایف بی آر کو ہدایت دی گئی ہے کہ وہ جیولرز ایسوسی ایشن کو سنا جائے اور ایس آر او 924(1)/2020 کے موثر نفاذ کے لیے جامع ایس او پیز تشکیل دے۔
مزید برآں، ایف ٹی او نے یہ بھی واضح کیا کہ ایس او پیز کی تیاری اور مفاہمتی عمل کے دوران ایف بی آر فیلڈ فارمیشنز کو ہدایت کرے کہ وہ جیولرز کے خلاف کسی قسم کے زبردستی یا دباؤ کے اقدامات نہ کریں۔
کاپی رائٹ بزنس ریکارڈر، 2025