پاکستان اسٹاک ایکسچینج میں ٹاپ 10 کمرشل بینکس کونسے

پاکستان میں کام کرنے والے مختلف مالیاتی اداروں میں کمرشل بینک غالب حیثیت رکھتے ہیں، اس کی بنیادی وجہ ان کا وسیع کسٹمر بیس، ملک گیر برانچ نیٹ ورک اور ریٹیل و کارپوریٹ بینکنگ خدمات میں نمایاں شمولیت ہے۔

پاکستان اسٹاک ایکسچینج (پی ایس ایکس) میں کمرشل بینک مارکیٹ کیپیٹلائزیشن اور تجارتی حجم کا ایک بڑا حصہ ہیں، جو سرمایہ کاروں اور مجموعی معیشت کے لیے ان کی اہمیت کو ظاہر کرتا ہے۔

یہ بینک نہ صرف مالیاتی ثالثی کو ممکن بنانے میں اہم کردار ادا کرتے ہیں بلکہ ایکویٹی مارکیٹ میں لیکویڈیٹی اور سرمایہ کاروں کے اعتماد کو بڑھانے کے کلیدی محرک بھی ہیں۔

یہ مضمون 8 ستمبر 2025 تک کی مارکیٹ کیپیٹلائزیشن کی بنیاد پر پی ایس ایکس میں درج ٹاپ 10 کمرشل بینکوں کا تعارف پیش کرتا ہے۔

• یونائیٹڈ بینک لمیٹڈ (یو بی ایل) (3,352 ملین ڈالر)

یونائیٹڈ بینک لمیٹڈ ایک بینکنگ کمپنی ہے جو پاکستان میں رجسٹرڈ ہے اور کمرشل بینکنگ اور متعلقہ خدمات میں مصروف ہے۔ یہ بینک بیسٹ وے انٹرنیشنل ہولڈنگز لمیٹڈ کی سبسڈری ہے، جو بذاتِ خود بیسٹ وے گروپ لمیٹڈ کی مکمل ملکیتی سبسڈری ہے۔

یو بی ایل پاکستان اسٹاک ایکسچینج میں دوسری سب سے قیمتی لسٹڈ کمپنی ہونے کی حیثیت سے اپنی پوزیشن برقرار رکھتا ہے۔

ٹاپ لائن سیکیورٹیز کے سی ای او محمد سہیل کے مطابق، یو بی ایل کی مارکیٹ کیپیٹلائزیشن نے محض دو سالوں میں چھ گنا غیر معمولی اضافہ کیا، جو 0.5 بلین ڈالر سے بڑھ کر 3 بلین ڈالر تک پہنچ گئی۔

بینک نے 31 مارچ 2025 کو ختم ہونے والی سہ ماہی میں بعد از ٹیکس منافع (پی اے ٹی) 36.11 ارب روپے ریکارڈ کیا، جو 2024 کی اسی مدت کے 16.14 ارب روپے کے پی اے ٹی کے مقابلے میں 124 زیادہ ہے۔

پاکستان اسٹاک ایکسچینج میں یو بی ایل کی موجودہ مارکیٹ کیپیٹلائزیشن 3,352 ملین ڈالر ہے۔

• میزان بینک لمیٹڈ (ایم ای بی ایل) (2,516 ملین ڈالر)

میزان بینک لمیٹڈ (ایم ای بی ایل) کو پاکستان میں 27 جنوری 1997 کو پبلک لمیٹڈ کمپنی کے طور پر کمپنیز ایکٹ 2017 (سابقہ کمپنیز آرڈیننس 1984) کے تحت رجسٹر کیا گیا۔ بینک کو 31 جنوری 2002 کو شیڈولڈ اسلامک کمرشل بینک کا لائسنس دیا گیا اور 20 مارچ 2002 سے باضابطہ طور پر بطور شیڈولڈ اسلامک کمرشل بینک آپریشنز کا آغاز کیا۔ اس وقت بینک کارپوریٹ، کمرشل، کنزیومر، انویسٹمنٹ اور ریٹیل بینکنگ سرگرمیوں میں مصروف ہے۔

میزان بینک نے 31 مارچ 2025 کو ختم ہونے والی سہ ماہی کے لیے بعد از ٹیکس مجموعی منافع 22.42 ارب روپے ظاہر کیا، جو گزشتہ سال کی اسی مدت (25.08 ارب روپے) کے مقابلے میں 12 فیصد کم ہے۔ پاکستان اسٹاک ایکسچینج کو بھیجے گئے نوٹس کے مطابق اس عرصے کے لیے فی حصص آمدنی (ای پی ایس) 12.32 روپے رہی، جو سال 2024 کی پہلی سہ ماہی میں 13.93 روپے تھی۔ بینک کے بورڈ آف ڈائریکٹرز نے 31 مارچ کو ختم ہونے والی مدت کے لیے فی حصص 7 روپے یعنی 70 فیصد کیش ڈیویڈنڈ کا اعلان بھی کیا۔

پاکستان اسٹاک ایکسچینج میں میزان بینک کی موجودہ مارکیٹ کیپیٹلائزیشن 2,516 ملین ڈالر ہے۔

• ایم سی بی بینک لمیٹڈ (ایم سی بی) (1,501 ملین ڈالر)

ایم سی بی بینک لمیٹڈ پاکستان کے بینکنگ شعبے کے بانی اداروں میں سے ایک ہے۔ یہ بینک نجی شعبے میں 1947 میں رجسٹر ہوا، تاہم 1974 میں اسے قومی ملکیت میں لے لیا گیا۔ بعد ازاں 1991 میں بینک کو نجی شعبے میں واپس دے دیا گیا۔ ایم سی بی پہلا پاکستانی بینک ہے جس کے گلوبل ڈپازٹ ریسیپٹس (جی ڈی آرز) 2006 میں لندن اسٹاک ایکسچینج میں درج ہوئے۔ یہ پہلا پاکستانی بینک ہے جس نے ایک مکمل ملکیتی اسلامی سبسڈری قائم کی۔

ایم سی بی بینک نے 2024 میں بعد از ٹیکس منافع 63.47 ارب روپے رپورٹ کیا، جو 2023 کے 65.27 ارب روپے کے مقابلے میں تقریباً 3 فیصد کمی ہے۔ پاکستان اسٹاک ایکسچینج کو جاری کردہ اپنے مجموعی بیان میں بینک کی فی حصص آمدنی (ای پی ایس) 2024 میں 53.35 روپے فی حصص ریکارڈ ہوئی، جو 2023 میں 54.94 روپے فی حصص تھی۔

2024 میں بینک کی فیس اور کمیشن سے آمدنی بڑھ کر 24.78 ارب روپے تک پہنچ گئی، جو سالانہ بنیاد پر 10 فیصد سے زیادہ اضافہ ہے۔

پاکستان اسٹاک ایکسچینج میں ایم سی بی بینک کی موجودہ مارکیٹ کیپیٹلائزیشن 1,501 ملین ڈالر ہے۔

• حبیب بینک لمیٹڈ (ایچ بی ایل) (1,360 ملین ڈالر)

حبیب بینک لمیٹڈ (ایچ بی ایل) پاکستان میں رجسٹرڈ ہے اور پاکستان و بیرون ملک کمرشل بینکنگ سے متعلقہ خدمات فراہم کرتا ہے۔ آغا خان فنڈ فار اکنامک ڈیولپمنٹ (اے کے ایف ای ڈی)، ایس.اے. بینک کی پیرنٹ کمپنی ہے اور اس کا رجسٹرڈ دفتر جنیوا، سوئٹزرلینڈ میں واقع ہے۔

ایچ بی ایل نے 30 جون 2025 کو ختم ہونے والے چھ ماہ کے لیے بعد از ٹیکس سے پہلے مجموعی منافع 75.3 ارب روپے ظاہر کیا، جو گزشتہ سال کی اسی مدت کے مقابلے میں 30 فیصد زیادہ ہے۔

بینک کا بعد از ٹیکس منافع 19 فیصد بڑھ کر 34.4 ارب روپے ہو گیا، حالانکہ ٹیکس کی شرح 4 فیصد زیادہ ہونے کے باعث بینکوں پر مزید بوجھ پڑا۔ 2025 کی پہلی ششماہی کے لیے فی حصص آمدنی (ای پی ایس) 2024 کی پہلی ششماہی کے 20.18 روپے کے مقابلے میں بہتر ہو کر 23.44 روپے ہوگئی۔ نتائج کے ساتھ ہی بینک نے 30 جون 2025 کو ختم ہونے والی دوسری سہ ماہی کے لیے فی حصص 4.50 روپے (یعنی 45 فیصد) کا عبوری کیش ڈیویڈنڈ بھی اعلان کیا۔ یہ اس عبوری کیش ڈیویڈنڈ کے علاوہ ہے جو پہلے ہی فی حصص 4.50 روپے (یعنی 45 فیصد) ادا کیا جا چکا ہے۔

پاکستان اسٹاک ایکسچینج میں ایچ بی ایل کی موجودہ مارکیٹ کیپیٹلائزیشن 1,360 ملین ڈالر ہے۔

• نیشنل بینک آف پاکستان (این بی پی) (1,296 ملین ڈالر)

نیشنل بینک آف پاکستان کو 1949 میں نیشنل بینک آف پاکستان آرڈیننس کے تحت پاکستان میں رجسٹر کیا گیا۔ یہ بینک پاکستان اور بیرون ملک کمرشل بینکنگ اور متعلقہ خدمات فراہم کرنے میں مصروف ہے۔ بطور ایجنٹ، یہ بینک اسٹیٹ بینک آف پاکستان کے لیے حکومتِ پاکستان کے ٹریژری لین دین بھی سنبھالتا ہے۔

جون میں بینک نے اعلان کیا کہ اس نے زرعی اور کنزیومر دونوں شعبوں کی خدمت کرتے ہوئے سونے کے عوض محفوظ کردہ کل واجب الادا قرضوں میں 100 ارب روپے کی حد عبور کرلی ہے۔

بعد ازاں اگست میں بینک نے 56.7 ارب روپے کا قبل از ٹیکس منافع رپورٹ کیا، حالانکہ اس میں 68.0 ارب روپے کے غیر معمولی اخراجات کو تسلیم کیا گیا جو پاکستان کی معزز سپریم کورٹ کے پنشن مقدمے کے فیصلے پر عمل درآمد کے لیے کیے گئے۔

پاکستان اسٹاک ایکسچینج میں نیشنل بینک آف پاکستان کی موجودہ مارکیٹ کیپیٹلائزیشن 1,296 ملین ڈالر ہے۔

• اسٹینڈرڈ چارٹرڈ بینک پاکستان (ایس سی بی پی ایل) (1,022 ملین ڈالر)

اسٹینڈرڈ چارٹرڈ بینک (پاکستان) لمیٹڈ کو پاکستان میں 19 جولائی 2006 کو رجسٹر کیا گیا اور اسٹیٹ بینک آف پاکستان سے 30 دسمبر 2006 سے بینکنگ کاروبار شروع کرنے کی منظوری ملی۔ بینک کی حتمی ہولڈنگ کمپنی اسٹینڈرڈ چارٹرڈ پی ایل سی ہے جو انگلینڈ میں رجسٹرڈ ہے۔ یہ بینک بینکنگ کمپنیز آرڈیننس 1962 میں متعین کردہ بینکاری کاروبار میں مصروف ہے۔

اسٹینڈرڈ چارٹرڈ بینک نے 2025 کی پہلی ششماہی میں 32.9 ارب روپے کا قبل از ٹیکس منافع ظاہر کیا، جو گزشتہ سال کی اسی مدت کے 49.3 ارب روپے سے کم تھا۔

بینک نے 2025 کی پہلی ششماہی میں کل آمدنی 44.4 ارب روپے ریکارڈ کی، جو 2024 کی پہلی ششماہی کے مقابلے میں 24 فیصد کم ہے، اس کمی کی بنیادی وجہ شرح سود میں کمی تھی۔ تاہم، زیادہ غیر فنڈڈ آمدنی اور فنڈز کی کم لاگت نے اس کمی کو کسی حد تک پورا کیا۔

اسٹینڈرڈ چارٹرڈ بینک پاکستان کی پاکستان اسٹاک ایکسچینج میں موجودہ مارکیٹ کیپیٹلائزیشن1,022 ملین ڈالر ہے۔

• بینک الحبیب لمیٹڈ (بی اے ایچ ایل) (758 ملین ڈالر)

بینک الحبیب لمیٹڈ کو پاکستان میں 15 اکتوبر 1991 کو کمپنیز آرڈیننس 1984 (منسوخ شدہ) کے تحت ایک پبلک لمیٹڈ کمپنی کے طور پر رجسٹر کیا گیا۔ یہ ایک شیڈولڈ بینک ہے جو بنیادی طور پر کمرشل بینکاری کے کاروبار میں مصروف ہے۔

اس سال کے شروع میں، بینک الحبیب لمیٹڈ نے باضابطہ طور پر کینیا میں اپنا نمائندہ دفتر بند کر دیا، جو پاکستان اور کینیا دونوں کے مرکزی بینکوں کی باضابطہ منظوریوں کے بعد کیا گیا۔

31 مارچ 2025 کو ختم ہونے والی پہلی سہ ماہی کے لیے، بینک الحبیب لمیٹڈ نے 33.71 ارب روپے کی خالص سودی آمدنی رپورٹ کی، جو ایک سال پہلے 37.21 ارب روپے تھی۔ جاری آپریشنز سے بنیادی فی حصص آمدنی 9.65 روپے ریکارڈ ہوئی جو گزشتہ سال 9.22 روپے تھی۔

پاکستان اسٹاک ایکسچینج میں بینک الحبیب لمیٹڈ کی موجودہ مارکیٹ کیپیٹلائزیشن 758 ملین ڈالر ہے۔

• الائیڈ بینک لمیٹڈ (اے بی ایل) (707 ملین ڈالر)

الائیڈ بینک لمیٹڈ پاکستان میں رجسٹرڈ ہے، یہ ایک شیڈولڈ بینک ہے جو کمرشل بینکنگ اور متعلقہ خدمات میں مصروف ہے۔ ابراہیم ہولڈنگز (پرائیویٹ) لمیٹڈ بینک کی پیرنٹ کمپنی ہے اور اس کا رجسٹرڈ دفتر پاکستان میں ہے۔ یہ بینک الائیڈ بینک لمیٹڈ ایسٹ مینجمنٹ کمپنی لمیٹڈ کا ہولڈنگ ادارہ ہے۔

الائیڈ بینک لمیٹڈ نے 2024 میں بعد از ٹیکس منافع 44.4 ارب روپے (159.4 ملین ڈالر) رپورٹ کیا، جو گزشتہ سال کی آمدنی کے مقابلے میں 7 فیصد سے زیادہ ہے۔

الائیڈ بینک لمیٹڈ کے مجموعی مالیاتی نتائج کے مطابق، بینک کی فی حصص آمدنی 2024 میں 38.77 روپے ریکارڈ ہوئی، جو 2023 میں 36.07 روپے تھی۔

پاکستان اسٹاک ایکسچینج میں الائیڈ بینک لمیٹڈ کی موجودہ مارکیٹ کیپیٹلائزیشن 707 ملین ڈالر ہے۔

• بینک الفلاح لمیٹڈ (بی اے ایف ایل) (591 ملین ڈالر)

بینک الفلاح لمیٹڈ ایک بینکنگ کمپنی ہے جو پاکستان میں 21 جون 1992 کو بطور پبلک لمیٹڈ کمپنی شامل کی گئی۔ اس نے اپنے بینکنگ آپریشنز یکم نومبر 1992 کو شروع کیے۔ یہ بینکنگ کمپنیز آرڈیننس 1962 میں بیان کردہ بینکنگ خدمات میں مصروف ہے۔

بینک الفلاح نے 2024 میں اپنے مجموعی منافع کو بڑھا کر 39.9 ارب روپے کرلیا، جو پچھلے سال کی اسی مدت کے مقابلے میں 10 فیصد سے زیادہ اضافہ ہے۔

ٹیکس کے بعد منافع میں اضافے کو غیر مارک اپ آمدن میں نمایاں اضافے سے منسوب کیا گیا ہے، جو کمیشن آمدن میں بہتری اور سیکیورٹیز پر بڑے پیمانے پر حاصل شدہ منافع کے باعث ہوا۔

بینک نے 2024 میں فی حصص آمدنی 25.27 روپے رپورٹ کی جبکہ گزشتہ سال کی اسی مدت میں یہ 23.15 روپے تھی۔

پاکستان اسٹاک ایکسچینج میں بینک الفلاح کی موجودہ مارکیٹ کیپٹلائزیشن 591 ملین ڈالر ہے۔

• حبِیب میٹروپولیٹن بینک لمیٹڈ (ایچ بی ایم) (454 ملین ڈالر)

حبِیب میٹروپولیٹن بینک لمیٹڈ کو پاکستان میں 3 اگست 1992 کو بطور پبلک لمیٹڈ کمپنی کمپنیز آرڈیننس 1984 (اب کمپنیز ایکٹ 2017) کے تحت شامل کیا گیا اور یہ کمرشل بینکنگ اور متعلقہ خدمات میں مصروف ہے۔ یہ بینک حبِیب بینک اے جی زیورخ – سوئٹزرلینڈ (ہولڈنگ کمپنی جس کے بینک میں 51 فیصد حصص ہیں) کی سبسڈری ہے، جو سوئٹزرلینڈ میں شامل کی گئی۔

اپنے 500 سے زائد برانچز کے نیٹ ورک کے ذریعے، حبِیب میٹروپولیٹن بینک روایتی بینکنگ خدمات کا ایک مجموعہ پیش کرتا ہے۔ یہ بینک اپنی خصوصی اسلامی بینکنگ برانچز اور اسلامی ونڈوز کے ذریعے اسلامی بینکنگ خدمات بھی فراہم کرتا ہے۔ حبِیب میٹروپولیٹن بینک چار براعظموں کے دس ممالک میں اپنی موجودگی رکھتا ہے۔

پاکستان اسٹاک ایکسچینج میں حبِیب میٹروپولیٹن بینک کی موجودہ مارکیٹ کیپٹلائزیشن 454 ملین ڈالر ہے۔

ہر کمپنی کی مارکیٹ کیپٹلائزیشن کا حساب پیر، 8 ستمبر 2025 کو لگایا گیا۔

اس حساب کے لیے، 1 امریکی ڈالر کے مقابلے میں 282 روپے کا تبادلہ ریٹ استعمال کیا گیا۔

اوپر دیا گیا آرٹیکل ریحان ایوب (نیوز ایڈیٹر، بزنس ریکارڈر ڈیجیٹل) نے لکھا، جبکہ حسین افضل (گرافکس) اور جنید سانور (ڈیٹا) نے معاونت فراہم کی۔