ایرن سمندری طوفان کی شدت کیٹیگری 3 تک کم ہوگئی، امریکی نیشنل ہریکین سینٹر

امریکی نیشنل ہریکین سینٹر کے مطابق بحرِ اوقیانوس کے 2025 کے سیزن کا پہلا طوفان ”ایرِن“ کمزور ہو کر کیٹیگری 3 کا ہریکین بن گیا ہے۔

اتوار کی صبح جاری بیان میں کہا گیا کہ ایرن کی زیادہ سے زیادہ ہوائیں 125 میل فی گھنٹہ (205 کلومیٹر فی گھنٹہ) تک ریکارڈ کی گئیں جبکہ یہ طوفان گرینڈ ترک آئی لینڈ سے تقریباً 330 میل مشرق-جنوب مشرق میں موجود تھا۔ ایرن اس سے قبل انتہائی خطرناک کیٹیگری 5 تک پہنچ گیا تھا جس میں ہواؤں کی رفتار 160 میل فی گھنٹہ تک ریکارڈ کی گئی تھی۔

محکمہ موسمیات کے مطابق طوفان کی سمت مغرب-شمال مغرب ہے اور اگلے دو دنوں میں شمال کی طرف مڑنے کا امکان ہے۔ ایرن اتوار اور پیر کی درمیانی شب ترکی اینڈ کیکوس اور جنوب مشرقی بہاماز کے مشرق سے گزرے گا۔ اس دوران لہریں اور طوفانی جھکڑ ورجن آئی لینڈز، پورٹو ریکو، ہسپانیولا اور دیگر قریبی علاقوں کو متاثر کریں گے، جو زندگی کے لیے خطرناک سمندری حالات اور رِپ کرنٹ پیدا کرسکتے ہیں۔

بہاماز نے اپنی زیرِ نگرانی برطانوی جزائر کے لیے ٹراپیکل اسٹورم وارننگ جاری کر دی ہے۔ ماہرین کے مطابق اگر ایرن ساحل سے دور گرم اور سرد ہوا کے ملاپ سے طاقت پکڑتا ہے تو یہ آگ بھڑکنے کے خطرات بھی بڑھا سکتا ہے۔ تاہم تخمینوں کے مطابق یہ امریکی مشرقی ساحل سے کافی فاصلے پر رہے گا اور بڑے نقصانات کا امکان کم ہے۔