ایئر عربیہ ابو ظہبی نے پاکستان میں فضائی آپریشنز میں توسیع کردی

ایئر عربیہ ابو ظہبی جو متحدہ عرب امارات کی پہلی کم لاگت ایئرلائن ہے، نے پاکستان میں اپنی خدمات میں توسیع کرتے ہوئے فیصل آباد اور ملتان کے لیے پروازوں کی تعداد بڑھا دی ہے۔

ایئرلائن نے ایک پریس بیان میں کہا کہ پروازوں میں اضافہ متحدہ عرب امارات اور پاکستان کے درمیان فضائی روابط کو مزید مستحکم کرتا ہے اور مسافروں کو سستی، قابلِ اعتماد اور آسان سفری سہولتوں کی فراہمی کے عزم کی عکاسی کرتا ہے۔

ایئرلائن کے مطابق ملتان کے لیے پروازوں کی تعداد ہفتہ وار دو سے بڑھا کر پانچ کردی گئی ہے، جب کہ ستمبر سے یہ سروس روزانہ کی بنیاد پر دستیاب ہوگی۔ دوسری جانب فیصل آباد کے لیے پروازیں بھی ہفتہ وار دو سے بڑھا کر چار کر دی گئی ہیں جس سے مسافروں کو مزید سہولت اور زیادہ لچکدار سفری آپشنز میسر آئیں گے۔

ایئر عربیہ کے گروپ چیف ایگزیکٹو آفیسر عادل العلی نے کہا کہ پاکستان ایئر عربیہ ابو ظہبی کے لیے ایک کلیدی ترقی پذیر مارکیٹ ہے۔

انہوں نے مزید کہا کہ ملتان اور فیصل آباد کے لیے پروازوں میں اضافہ اس بات کا ثبوت ہے کہ ہم یو اے ای اور پاکستان کے درمیان کم لاگت اور بااعتماد سفری سہولتوں کی بڑھتی ہوئی مانگ کو پورا کرنے کے لیے پُرعزم ہیں، ساتھ ہی مسافروں کو مزید سہولت اور بہتر روابط فراہم کرنا چاہتے ہیں۔

حالیہ دنوں میں ایئر عربیہ ابو ظہبی نے سیالکوٹ کے لیے بھی براہِ راست پرواز کا آغاز کیا ہے جس سے پاکستان میں اس کی فضائی رسائی میں مزید وسعت آئی ہے۔

ایئرلائن نے یہ بھی اعلان کیا ہے کہ وہ سال کے اختتام سے قبل اپنے فضائی بیڑے میں دو نئے طیارے شامل کرے گی جس سے نہ صرف آپریشنل صلاحیت بڑھے گی بلکہ نئی منزلوں کے لیے پروازوں کے آغاز میں بھی مدد ملے گی۔

دوسری جانب چند روز قبل برطانیہ نے پاکستان کو اپنی ایئر سیفٹی لسٹ سے نکال دیا ہے جس کے بعد پاکستانی ایئرلائنز کو اب برطانیہ کے لیے پروازیں شروع کرنے کی اجازت حاصل کرنے کا موقع مل گیا ہے۔