امریکی کرنسی کے مقابلے روپے کی قدر میں 10 پیسے تنزلی

انٹربینک مارکیٹ میں بدھ کو ڈالر کے مقابلے روپے کی قدر میں 0.03 فیصد کی گراوٹ دیکھی گئی ۔

کاروبار کے اختتام پر ڈالر کے مقابلے روپیہ 10 پیسے کی تنزلی سے 282.22 پر بند ہوا۔

یاد رہے کہ منگل کو امریکی کرنسی کے مقابلے میں روپیہ 282.12 پر بند ہوا تھا۔

بین الاقوامی سطح پر بدھ کو امریکی ڈالر قدرے نیچے آیا کیونکہ مارکیٹ فوری تجارتی اشاروں کیلئے امریکی روزگار کے اعدادوشمار کا انتظار کررہی تھی جب کہ صدر ڈونلڈ ٹرمپ کی اہم تجارتی شراکت داروں بشمول چین کے ساتھ ٹیرف مذاکرات میں پیش رفت کی منتظر تھی۔

ٹرمپ انتظامیہ نے بدھ کا دن ان ممالک کے لیے آخری تاریخ مقرر کیا ہے کہ وہ تجارت کے حوالے سے اپنی بہترین پیشکشیں جمع کروائیں۔ اسی دن درآمد شدہ اسٹیل اور ایلومینیم پر ڈیوٹی کو دگنا کرکے 50 فیصد کرنے کا فیصلہ بھی نافذ العمل ہوگا۔

وائٹ ہاؤس کے مطابق توقع ہے کہ صدر ٹرمپ رواں ہفتے چینی صدر شی جن پنگ سے ٹیلیفونک گفتگو کریں گے۔یاد رہے کہ دونوں فریقین نے گزشتہ ماہ کچھ ٹیرف واپس لینے کے معاہدے کی خلاف ورزی کے الزامات ایک دوسرے پر عائد کیے تھے۔

ادھر اگرچہ تجارتی کشیدگیاں بدستور مرکزی حیثیت رکھتی ہیں، اس ہفتے امریکی کرنسی کی قدر کو متحرک کرنے والے عوامل میں ایک بار پھر میکرو اکنامک اشاریے نمایاں ہوگئے ہیں۔