بھارتی فوج نے بھی آخرکار ہفتے کو پہلی بار پاک فضائیہ کے ہاتھوں اپنے لڑاکا طیاروں کی تباہی کی تصدیق کردی، تاہم تعداد ظاہر کرنے سے گریز کیا۔
بلومبرگ کو دیے گئے ایک انٹرویو میں بھارتی افواج کے چیف آف ڈیفنس اسٹاف جنرل انیل چوہان نے کہا کہ طیارے گرنا اہم نہیں، یہ جاننا ضروری ہے کہ وہ کیوں گرے۔
انہوں نے کہا کہ پاکستان کا یہ دعویٰ کہ اس نے 6 بھارتی لڑاکا طیارے مار گرائے، بالکل غلط ہے، تاہم انہوں نے یہ نہیں بتایا کہ بھارت نے اس جنگ میں کتنے طیارے کھوئے۔
جب لڑاکا طیاروں کے بارے میں پوچھا گیا تو جنرل انیل چوہان نے کہا کہ اہم یہ ہے کہ وہ کیوں گرائے گئے، کون سی غلطیاں ہوئیں — یہی باتیں معنی رکھتی ہیں۔
یاد رہے کہ پاک بھارت جھڑپ کا آغاز پہلگام حملے کے بعد ہوا، پہلگام حملے میں 26 افراد مارے گئے تھے جن میں زیادہ تر سیاح تھے۔ نئی دہلی نے اس حملے کا الزام پاکستان پر لگایا جسے اسلام آباد نے مسترد کردیا۔
دوسری جانب 7 مئی کو پاکستان نے اعلان کیا کہ اس نے 6 بھارتی لڑاکا طیارے مار گرائے ہیں، جن میں کم از کم تین رافیل طیارے شامل ہیں جبکہ بھارتی حکومت نے پہلے طیارے کے حوالے سے تبصرہ کرنے سے گریز کیا تھا۔
بعد ازاں دونوں جوہری قوتوں کے درمیان جنگ بندی کا معاہدہ طے پاگیا۔
30 مئی کو بھارتی وزیر دفاع راجناتھ سنگھ نے کہا تھا کہ بھارت مستقبل میں پاکستان کی کسی بھی جارحیت کے جواب میں اپنی بحریہ کی طاقت کا بھرپور استعمال کرے گا۔