یوکرین کا ایک اور ایف-16 جنگی طیارہ تباہ، پائلٹ محفوظ رہا، فضائی حکام کی تصدیق

یوکرینی فضائیہ نے جمعے کو اپنے بیان میں تصدیق کی ہے کہ اس کا ایک ایف-16 لڑاکا طیارہ تباہ ہوگیا ہے۔ حکام نے طیارہ تباہ ہونے کی وجہ اس کے اندر ”ایک حادثہ“ بتایا ہے تاہم ان کا کہنا ہے کہ پائلٹ بحفاظت طیارے سے نکلنے میں کامیاب ہو گیا ہے۔

یوکرینی فضائیہ نے ٹیلی گرام پر ایک بیان میں کہا کہ طیارے میں ایک غیر معمولی صورتِ حال پیدا ہوئی تاہم پائلٹ طیارے کو آبادی دور لے جا کر اس سے بحفاظت نکلنے میں کامیاب ہوگیا۔

فضائیہ کا کہنا ہے کہ پائلٹ مکمل خیریت سے ہے تاہم واقعے کی تحقیقات کیلئے ایک کمیشن تشکیل دیا گیا ہے۔

یوکرین میں ایف سولہ طیارہ تباہ ہونے کا یہ دوسرا موقع ہے۔ گزشتہ برس سابق امریکی صدر جوبائیڈن کی انتظامیہ سے منظوری ملنے کے بعد اتحادیوں کی طرف سے یوکرین کو یہ طیارے فراہم کیے جارہے ہیں۔

اس سے قبل اگست 2024 کے آخر میں بھی یوکرین کا ایک ایف سولہ طیارہ اس وقت گر کر تباہ ہوگیا تھا جب یوکرینی فضائیہ کا پائلٹ ایک بڑے روسی فضائی حملے کو روکنے کی کوشش کررہا تھا۔ اس واقعے میں پائلٹ ہلاک ہوگیا تھا۔