اٹل، عمرزئی کی شاندار بیٹنگ، آسٹریلیا کو جیت کیلئے 274 کا ہدف
صدیق اللہ اٹل اور عظمت اللہ عمرزئی کی نصف سنچریوں کی بدولت افغانستان نے چیمپئنز ٹرافی کے اہم میچ میں آسٹریلیا کو جیت کے لیے 274 رنز کا ہدف دیا ہے۔
لاہور کے قذافی اسٹیڈیم میں کھیلے گئے میچ میں اٹل نے 95 گیندوں پر 6 چوکے اور 3 چھکوں کی مدد سے 85 رنز کی اننگز کھیلی جس کے بعد عمرزئی نے 63 گیندوں پر 67 رنز کی اننگز کھیلی
افغانستان کی ٹیم مقررہ 50 اوورز کے بعد 273 رنز بنا کر آؤٹ ہو گئی۔
جیتنے والی ٹیم گروپ بی میں ٹاپ ٹو پوزیشن پر آنے کے ساتھ ساتھ سیمی فائنل میں بھی جگہ بنائے گی۔
ٹاس جیت کر پہلے بیٹنگ کرنے والی افغان ٹیم کو پہلے ہی اوور میں اوپنر گنوانا پڑا کیوں کہ رحمان اللہ گرباز کوئی رن بنائے بغیر اسپنسر جانسن کے ہاتھوں آؤٹ ہوئے۔
انگلینڈ کے خلاف افغانستان کی فتح کے ہیرو ابراہیم زدران نے اٹل کے ساتھ دوسری وکٹ کے لیے 67 رنز جوڑے جس کے بعد وہ 22 رنز بناکر اسپنر ایڈم زمپا کے ہاتھوں آؤٹ ہو گئے۔
اٹل اور کپتان حشمت اللہ شاہدی (20) نے چوتھی وکٹ کے لیے 68 رنز کی شراکت قائم کی جس کے بعد آسٹریلیا نے صرف 40 رنز کے اضافے سے چار وکٹیں حاصل کیں۔
199 پر 7 وکٹیں گرنے کے بعد افغان ٹیم کے کم اسکور پر آؤٹ ہونے کا خطرہ تھا تاہم عمر زئی نے آخری تین وکٹوں کے ساتھ ملکر 74 رنز کا قیمتی اضافہ کیا اور انہوں نے 5 چھکے لگائے۔
راشد خان نے 17 گیندوں پر 19 رنز کی اننگز کھیلی۔
آسٹریلیا کی جانب سے بین ڈورشوئس نے 47 رنز دے کر 3 وکٹیں حاصل کیں جبکہ زمپا نے 48 رنز دے کر 2 وکٹیں حاصل کیں جبکہ جانسن نے 49 رنز دے کر 2 وکٹیں حاصل کیں۔