پاکستان ٹیم کے لیفٹ آرم اسپنر نعمان علی نے پاکستان اور ویسٹ انڈیز کے درمیان حال ہی میں ختم ہونے والی ٹیسٹ سیریز میں شاندار کارکردگی کا مظاہرہ کرتے ہوئے آئی سی سی مینز ٹیسٹ بالنگ رینکنگ میں کیریئر بیسٹ پوزیشن حاصل کرلی ہے۔

وہ دوسرے ٹیسٹ میں ہیٹ ٹرک کرنے والے پہلے پاکستانی اسپنر بننے اور میچ میں مجموعی طور پر 10 وکٹیں حاصل کرنے کے بعد 4 درجے ترقی پاکر 806 ریٹنگ پوائنٹس کے ساتھ پانچویں نمبر پر براجمان ہوگئے۔

نعمان علی ٹیسٹ میں 800 پوائنٹس کا سنگ میل عبور کرنے والے صرف 12 ویں پاکستانی بالر ہیں اور اس وقت ٹاپ 20 میں اپنے پاکستان کے واحد بالر ہیں۔

آف اسپنر ساجد خان دو درجے ترقی کے ساتھ 21 ویں اور ابرار احمد دو درجے ترقی کے ساتھ 50 ویں نمبر پر پہنچ گئے ہیں۔

دوسرے ٹیسٹ میں 70 رنز دے کر 9 وکٹیں حاصل کرنے والے ویسٹ انڈیز کے لیفٹ آرم اسپنر جومیل واریکن 16 درجے ترقی کے ساتھ 25 ویں نمبر پر پہنچ گئے ہیں۔

انہوں نے دو ٹیسٹ میچوں میں 19 وکٹوں کی واپسی کے ساتھ مجموعی طور پر 28 درجے ترقی کی ہے۔ انہیں سیریز کا بہترین کھلاڑی قرار دیا گیا تھا۔

ویسٹ انڈیز کے کپتان کریگ بریتھ ویٹ دوسری اننگز یں نصف سنچری کی بدولت 8 درجے ترقی پاکر بلےبازوں کی رینکنگ میں 44 ویں نمبر پر پہنچ گئے ہیں۔ ان کی اس اننگز کی بدولت مہمان ٹیم نے 120 رنز سے فتح حاصل کی تھی۔

پاکستان کے وکٹ کیپر بلے باز محمد رضوان دو درجے بہتری کے بعد 17 ویں سے 15 ویں پوزیشن پر پہنچ گئے ہیں۔