پاکستان تحریک انصاف (پی ٹی آئی) نے جمعیت علمائے اسلام (ف) کو حکومت کے خلاف مشترکہ تحریک شروع کرنے کی دعوت دے دی ہے۔

یہ پیشکش پی ٹی آئی کے وفد، جس میں شامل عمر ایوب، اسد قیصر، صاحبزادہ حامد رضا، سلمان اکرم راجہ اور اخونزادہ حسین تھے، نے جمعیت علمائے اسلام (ف) کے سربراہ مولانا فضل الرحمان سے ان کی رہائش گاہ پر ملاقات کے دوران کی ہے۔

جمعیت علمائے اسلام (ف) کے سربراہ مولانا فضل الرحمان نے پی ٹی آئی وفد کو یقین دلایا ہے کہ وہ اپنی جماعت کے اندر مشاورت کریں گے۔

ملاقات کے بعد دونوں جماعتوں نے مشترکہ پریس کانفرنس بھی کی جہاں پی ٹی آئی نے باضابطہ طور پر حکومت کے خلاف مشترکہ تحریک چلانے کا خیال پیش کیا۔

جے یو آئی (ف) کے سینیٹر کامران مرتضیٰ نے انہیں یقین دلایا کہ وہ اس تجویز پر غور کریں گے۔ انہوں نے دونوں فریقوں کی جانب سے 2 رکنی کمیٹی تشکیل دینے کا بھی اعلان کیا تاکہ رابطے کو آسان بنایا جاسکے اور کسی بھی غلط فہمی کو دور کیا جاسکے۔

اس موقع پر سلمان اکرم راجہ نے تمام اسٹیک ہولڈرز پر زور دیا کہ وہ آئین کے تحفظ کے لیے متحد ہوجائیں۔ انہوں نے مزید کہا کہ جے یو آئی (ف) کی شمولیت سے پی ٹی آئی کی حکومت مخالف مہم کو نئی تحریک ملے گی۔