لوہے اور اسٹیل کے تقریباً 9 درآمد کنندگان گزشتہ تین مالی سال میں 9.7 ارب روپے کی بڑی منی لانڈرنگ میں پکڑے گئے ہیں۔

بزنس ریکارڈرکی رپورٹ کے مطابق پوسٹ کلیئرنس آڈٹ (پی سی اے) ساؤتھ نے لوہے اور اسٹیل کے شعبے میں تقریباً 9.7 ارب روپے کی منی لانڈرنگ کے ایک بڑے کیس کا پردہ فاش کیا ہے۔

اس اسکینڈل کا تعلق 9 جعلی درآمد کنندگان سے ہے جنہوں نے ڈیوٹی ٹیکس کی مد میں 315 ملین روپے سے بچنے کے لیے ”مینوفیکچرنگ اسٹیٹس“ کا فائدہ اٹھایا۔

پی سی اے ساؤتھ نے بڑے پیمانے پر غلط استعمال کی اطلاعات کے بعد لوہے اور اسٹیل کی درآمدات پر توجہ مرکوز کرتے ہوئے سیکٹر پر مبنی آڈٹ شروع کیا۔

پی سی اے ساؤتھ نے 9 درآمد کنندگان کو آڈٹ نوٹس جاری کیے، تاہم کورئیر کمپنی کی جانب سے تمام نوٹسز اس ریمارکس کے ساتھ واپس کیے گئے کہ پتے ناقابلِ شناخت تھے۔

پی سی اے ٹیموں کی تصدیق کے بعد اس بات کی بھی تصدیق ہوئی کہ 9 درآمد کنندگان کا وجود ہی نہیں تھا۔

ایف بی آر کے ڈیٹا بیس کی چھان بین سے یہ بات سامنے آئی کہ ان کمپنیوں نے 9.72 ارب روپے بیرون ملک منتقل کیے جب کہ مینوفیکچرنگ اسٹیٹس کے غلط استعمال کے ذریعے حاصل کردہ غیر قانونی چھوٹ کے ذریعے 315 ملین روپے ٹیکس چوری کی۔

ان درآمد کنندگان کے طریقہ کار سے پتہ چلتا ہے کہ یہ غیر قانونی طور پر ملک سے باہر رقوم بھیجنے کی ایک منظم سازش ہے۔

جانچ پڑتال نے یہ بھی انکشاف کیا کہ 9 درآمد کنندگان کے انکم ٹیکس کے مطابق مالیاتی مالیت بہت پتلی تھی، جس کی وجہ سے اتنی بڑی درآمدات کی مالی اعانت انتہائی مشکوک تھی۔

اس سے بھی زیادہ حیرت انگیز بات یہ ہے کہ 9 درآمد کنندگان میں سے تین نے انکم ٹیکس گوشوارے جمع ہی نہیں کیے جس کی وجہ سے ان کی مالی مالیت صفر ثابت ہوئی جبکہ 2 ارب 48 کروڑ روپے کی درآمدات کی مالی اعانت کی گئی، جس سے منی لانڈرنگ اسکینڈل ظاہر ہوتا ہے۔

پی سی اے کی ٹیمیں ان دھوکہ دہی کی کارروائیوں کے پیچھے اصل ماسٹر مائنڈز کی شناخت کے لیے چھان بین کررہی ہیں۔ تحقیقات میں اس بات کا بھی احاطہ کیا جائیگا کہ ایسی کمپنیاں کس طرح کسی فزیکل وجود کے بغیر مینوفیکچرنگ اسٹیٹس رجسٹریشن حاصل کرنے میں کامیاب رہیں۔

ڈائریکٹر جنرل چوہدری ذوالفقارعلی اور ڈائریکٹر پی سی اے ساؤتھ شیراز احمد کی سربراہی میں پی سی اے کی ٹیمیں اب ان فراڈ کارروائیوں کے اصل ماسٹر مائنڈز کی نشاندہی کے لئے تحقیقات کر رہی ہیں۔

کاپی رائٹ بزنس ریکارڈر، 2024