وزیراعظم شہباز شریف نے کہا ہے کہ چین پاکستان اقتصادی راہداری (سی پیک) کے دوسرے مرحلے پر تیزی سے کام جاری ہے اور چینی ماہرین کے دورہ پاکستان کے دوران مختلف شعبوں میں چین کے ساتھ تعاون کو مزید فروغ دینے پر مثبت رفتار آئی ہے۔

ان خیالات کا اظہار انہوں نے سرکاری ادارے چائنا پبلک ڈپلومیسی ایسوسی ایشن کی دعوت پر چین کے سرکاری دورے سے واپس آنے والے صحافیوں کے 7 رکنی وفد سے ملاقات کے دوران کیا۔

انہوں نے کہا کہ چین مخلص دوست ہے جس نے ہر مشکل موقع پر پاکستان کی مدد کی۔

انہوں نے تمام اسٹیک ہولڈرز پر زور دیا کہ وہ سیاست سے بالاتر ہو کر سی پیک جیسے قومی ترقیاتی منصوبوں پر مل کر کام کریں۔

وزیراعظم نے کہا کہ جب بھی اللہ تعالیٰ نے انہیں ملک کی خدمت کا موقع دیا تو انہوں نے اپنے آپ سے عہد کیا کہ وہ اپنی تمام تر توانائیاں ملک کی ترقی پر صرف کریں گے۔

انہوں نے کہا کہ وہ اپنے حالیہ دورہ چین کے دوران مثالی مہمان نوازی پر چینی قیادت اور عوام کے مشکور ہیں۔ انہوں نے بتایا کہ دورہ چین کے بعد مفاہمت کی یادداشتوں اور معاہدوں پر پیش رفت کا خود جائزہ لے رہے ہیں۔

وزیراعظم نے یقین دلایا کہ پاکستان چینی شہریوں کی حفاظت کیلئے تمام اقدامات کو یقینی بنا رہا ہے۔

انہوں نے کہا کہ چین جیسے قریبی دوست کے ساتھ تعلقات پر کسی قسم کی سیاست کی کوئی جگہ نہیں ہے۔

اس موقع پر وزیر اطلاعات و نشریات عطاء اللہ تارڑ بھی موجود تھے۔ صحافیوں کے وفد میں دنیا نیوز کے سلمان غنی، ہم نیوز کے عامر میر، شیراز حسین، روزنامہ جنگ کے خضر حیات، ڈان نیوز کے خالد حسنین، جیو نیوز کے اعظم ملک اور پاکستان ٹیلی وژن کے مطیع الرحمان شامل تھے۔

وفد کے ارکان نے وزیراعظم کو دورے کے دوران اپنے تجربات سے آگاہ کیا اور پاک چین تعلقات کے بارے میں خیالات کا اظہار کیا۔ وفد نے وزیراعظم کو دورے کے دوران ہونے والی ملاقاتوں سے آگاہ کیا اور کہا کہ چین پاکستان کے ساتھ اپنے برادرانہ تعلقات کو انتہائی قدر کی نگاہ سے دیکھتا ہے۔

وفد نے حکومت کی کاروباری اور سرمایہ کار دوست پالیسیوں پر وزیراعظم کو خراج تحسین پیش کیا۔

انہوں نے وزیر اعظم کو حکومت پاکستان کے بارے میں چینی قیادت اور عوام کے خیالات سے آگاہ کرتے ہوئے کہا کہ چین کو چینی سرمایہ کاری بالخصوص چین پاکستان اقتصادی راہداری (سی پیک) کے منصوبوں پر کام کی رفتار پر وزیر اعظم شہباز شریف کی قیادت میں اٹھائے گئے حکومتی اقدامات پر اطمینان ہے۔

ارکان نے بتایا کہ چینی حکام نے مختلف مواقع پر شہباز اسپیڈ کا ذکر کیا اور وزیر اعظم کے اصلاحاتی ایجنڈے کو سراہا۔ انہوں نے مزید کہا کہ چینی حکام سے ملاقاتوں کے دوران انہوں نے پاک چین اقتصادی تعاون بالخصوص سی پیک کے حوالے سے خصوصی جوش و خروش دیکھا۔