ایران اور سویڈن نے ہفتے کے روز قیدیوں کے تبادلے کا اعلان کیا ہے جس میں سویڈن میں قید ایک سابق ایرانی اہلکار کو رہا کیا گیا ہے کیونکہ اسٹاک ہوم نے کہا کہ تہران نے ایک سویڈیش شہری اور ایک یورپی یونین کے سفارتکار کو رہا کیا ہے۔
ایران کی اعلیٰ کونسل برائے انسانی حقوق کے سربراہ کاظم غریب آبادی نے سوشل میڈیا پلیٹ فارم ایکس پر ایک پوسٹ میں کہا کہ حامد نوری، جو 2019 سے سویڈن میں غیر قانونی حراست میں ہیں، آزاد ہیں اور وہ چند گھنٹوں میں ملک واپس آجائیں گے۔
اس کے فوراً بعد سویڈن کے وزیر اعظم نے کہا کہ جوہان فلوڈیرس، ایک یورپی یونین کے سفارت کار، اور ایک اور سویڈش شہری جو ایران میں قید تھے کو رہا کر دیا گیا ہے اور وہ اپنے گھر پر ہیں۔
33 سالہ فلوڈیرس کو ایران میں اپریل 2022 سے جاسوسی کے الزام میں حراست میں لیا گیا تھا۔ اسے موت کی سزا سنائے جانے کا خطرہ تھا۔
دوسرے سویڈش شہری سعید عزیزی کو نومبر 2023 میں گرفتار کیا گیا تھا۔
سویڈن کے وزیر اعظم الف کرسٹرسن نے کہا کہ وہ اپنے گھر جا رہے ہیں اور آخر کار اپنے رشتہ داروں کے ساتھ مل جائیں گے۔
غریب آبادی نے کہا کہ نوری کی رہائی مرحوم ایرانی وزیر خارجہ حسین امیر عبداللہیان کی کوششوں کی بدولت ہوئی، جو مئی میں صدر ابراہیم رئیسی کے ساتھ ہیلی کاپٹر کے حادثے میں جاں بحق ہو گئے تھے۔
عمان کی سرکاری نیوز ایجنسی (او این اے) نے بعد میں کہا کہ تہران اور اسٹاک ہوم نے عمان کی ثالثی کے بعد دونوں ممالک میں زیر حراست شہریوں کی ”باہمی رہائی“ پر اتفاق کیا ہے۔
او این اے نے کہا کہ رہائی پانے والوں کو آج 15 جون 2024 کو تہران اور سٹاک ہوم سے مسقط منتقل کیا گیا تھا، تاکہ ان کی وطن واپسی ہو۔
کشیدہ تعلقات
نوری کے بیٹے ماجد نے ایکس پر ایرانی حکام کی ”طاقتور اور پرجوش“ کوششوں کی تعریف کی جس نے “1,680 دنوں کی اسیری کے بعد ان والد کی رہائی کو یقینی بنایا۔
انہوں نے مزید کہا کہ وہ ہفتے کے دن کے بعد تہران کے مہرآباد ہوائی اڈے پر نوری کا استقبال کریں گے۔
63 سالہ نوری ایرانی جیل کا ایک سابق اہلکار ہے جسے نومبر 2019 میں اسٹاک ہوم کے ہوائی اڈے سے گرفتار کیا گیا تھا اور بعد میں سویڈن میں ایرانی حکومت کے مخالفین کی جانب سے 1988 میں ان کے خلاف پولیس میں قتل کی شکایت درج کرانے کے بعد عمر قید کی سزا سنائی گئی تھی۔
اس کا مقدمہ ایران عراق جنگ کے اختتام پر باغی پیپلز مجاہدین آف ایران (ایم ای کے) کے حملوں کا بدلہ لینے کے لیے پورے ایران میں کم از کم 5000 قیدیوں کے قتل سے متعلق ہے۔
سویڈن کی ایک عدالت نے نوری کو ”بین الاقوامی انسانی قانون کی سنگین خلاف ورزیوں اور قتل“ کا مجرم قرار دیا تھا لیکن اس نے دلیل دی تھی کہ وہ زیر بحث مدت کے دوران چھٹی پر تھے۔
ایران نے اس سزا کی مذمت کی لیکن سویڈن نے اصرار کیا کہ مقدمے کی سماعت اس کے عالمی دائرہ اختیار کے اصول کے تحت کی گئی ہے جو اسے مقدمہ چلانے کی اجازت دیتا ہے قطع نظر اس کے کہ مبینہ جرم کہاں ہوا ہے۔
کرسٹرسن نے کہا کہ ایران نے فلوڈیرس اور عزیزی کو ایک مذموم مذاکراتی کھیل میں پیادہ بنا دیا ہے جس کا مقصد ایرانی شہری حامد نوری کو سویڈن کی جیل سے رہا کرانا ہے۔
انہوں نے مزید کہا کہ بطور وزیر اعظم سویڈش شہریوں کی حفاظت ان کی خصوصی ذمہ داری تھی اس لیے حکومت نے سویڈن کی سیکیورٹی سروس کے ساتھ مل کر اس معاملے پر پوری شدت سے کام کیا ہے۔
کرسٹرسن نے مزید کہا کہ یہ سب کچھ واضح ہے کہ آپریشن کے لیے کچھ مشکل فیصلوں کی ضرورت ہوگی، اب ہم نے یہ فیصلے کر لیے ہیں۔
دیگر سویڈش شہری بھی ایران میں قید ہیں جن میں دہری شہریت والے احمد رضا جلالی بھی شامل ہیں جنہیں 2016 میں حراست میں لیے جانے کے بعد سزائے موت سنائی گئی تھی تاہم اب تک ان کی سزا پر عملدرآمد نہیں کیا گیا ہے۔
اسلامی جمہوریہ دوہری شہریت کو تسلیم نہیں کرتا۔
فرانس، برطانیہ، جرمنی اور آسٹریا سمیت کئی دیگر یورپی باشندے اب بھی ایران میں قید ہیں۔
جمعرات کو 36 سالہ فرانسیسی شہری لوئس ارناؤڈ قومی سلامتی کو نقصان پہنچانے کے الزامات پر ایران میں 20 ماہ سے زیادہ قید گزارنے کے بعد پیرس واپس لوٹے۔
سرگرم کارکن اور کچھ مغربی حکومتیں ایران پر الزام عائد کرتی ہیں کہ وہ مغرب سے رعایتیں لینے کے لیے غیر ملکی شہریوں کو یرغمال بنانے کی حکمت عملی استعمال کر رہا ہے۔
پچھلے سال عمان نے ایران اور امریکہ کے درمیان تبادلے کے معاہدے میں ثالثی کرنے کے ساتھ ساتھ ایران میں چھ یورپی قیدیوں کی رہائی میں مدد کی تھی۔