سونے کی فی تولہ قیمت میں 1700 روپے کا اضافہ

بین الاقوامی مارکیٹ میں سونے کے نرخوں میں اضافے کے تناظر میں پاکستان میں بھی سونے کی قیمتوں میں اضافہ ریکارڈ کیا گیا۔ مقامی صرافہ مارکیٹوں میں پیر کے روز سونے کی فی تولہ قیمت ایک ہزار 700 روپے بڑھنے سے 3 لاکھ 3 ہزار 200 روپے ہوگئی۔

آل پاکستان جیمز اینڈ جیولرز صرافہ ایسوسی ایشن (اے پی جی جے ایس اے) کے مطابق 10 گرام سونے کی قیمت 1458 روپے اضافے کے بعد 2 لاکھ 59 ہزار 945 روپے ہوگئی۔

ہفتہ کو سونے کی فی تولہ قیمت 4 ہزار 700 روپے کمی سے 3 لاکھ 1 ہزار 500 روپے ہوگئی تھی۔

پیر کے روز سونے کی بین الاقوامی قیمت میں اضافہ ہوا۔ اے پی جی جے ایس اے کے مطابق فی اونس سونے کی قیمت 2،900 ڈالر تھی، جس میں کاروباری دن کے دوران 17 ڈالر کا اضافہ ہوا۔

دوسری جانب چاندی کی فی تولہ قیمت 3 ہزار 350 روپے پر مستحکم رہی۔

پاکستان میں جمعہ کو سونے کی فی تولہ قیمت 3 لاکھ 6 ہزار 200 روپے کی بلند ترین سطح پر پہنچ گئی تھی۔