وزیرداخلہ سے قائم مقام امریکی سفیر کی ملاقات، تعلقات کو فروغ دینے پر تبادلہ خیال

وفاقی وزیر داخلہ محسن نقوی سے قائم مقام امریکی سفیر نیٹلی بیکر نے ملاقات کی اور امید ظاہر کی کہ امریکی صدر ڈونلڈ ٹرمپ کے دور میں پاکستان اور امریکا کے تعلقات مزید مستحکم ہوں گے۔

ملاقات کے دوران پاک امریکا تعلقات، باہمی دلچسپی کے امور اور دوطرفہ تعاون بڑھانے پر تبادلہ خیال کیا گیا۔

اپنے حالیہ دورے کا ذکر کرتے ہوئے وزیر داخلہ نے کہا کہ امریکی کانگریس کے ارکان کے ساتھ ملاقاتیں بہت مثبت رہیں۔

انہوں نے کہا کہ پاکستان اور امریکہ کے درمیان کئی دہائیوں پر محیط بہترین تعلقات ہیں۔

دونوں رہنماؤں نے دہشت گردی کا مقابلہ کرنے اور دوطرفہ تعلقات کو مزید فروغ دینے کے لئے مشترکہ حکمت عملی تیار کرنے پر بھی تفصیلی بات چیت کی۔

محسن نقوی نے کہا کہ دہشت گردی ایک بین الاقوامی مسئلہ ہے اور عالمی برادری کو اس سے نمٹنے کیلئے مل کر کام کرنا چاہئے۔

وفاقی وزیر نے مزید کہا کہ پاکستان کے قانون نافذ کرنے والے اداروں کو مضبوط بنانے میں امریکہ کا تعاون انتہائی اہمیت کا حامل ہے۔