سیکیورٹی فورسز کا آپریشن، دہشت گردی میں ملوث افغان شہری مارا گیا

شمالی وزیرستان میں سیکیورٹی فورسز کے آپریشن کے دوران دہشت گردی میں ملوث افغان شہری مارا گیا۔

پاک فوج کے شعبہ تعلقات عامہ (آئی ایس پی آر) کے مطابق 6 فروری 2025 کو شمالی وزیرستان کے علاقے دتہ خیل میں سیکیورٹی فورسز کے آپریشن کے دوران دہشت گردی میں ملوث ایک افغان شہری مارا گیا۔

بیان کے مطابق ہلاک دہشت گرد کی شناخت لقمان عرف نصرت (افغان شہری) کے نام سے ہوئی جو افغانستان میں صوبہ خوست کے ضلع سپیرا کا رہائشی کمال خان کا بیٹا ہے۔

آئی ایس پی آر کا کہنا ہے کہ افغان شہری ہونے کے ناطے اس شخص کی لاش کو تحویل میں لینے کے لیے عبوری افغان حکومت کے حکام سے رابطہ کیا جارہا ہے۔

اس طرح کے واقعات پاکستان میں دہشت گردی کی سرگرمیوں میں افغان شہریوں کے ملوث ہونے کا ناقابل تردید ثبوت ہیں۔

آئی ایس پی آر نے کہا کہ عبوری افغان حکومت سے توقع کی جاتی ہے کہ وہ اپنی ذمہ داریاں پوری کرے گی اور دہشتگردوں کی جانب سے پاکستان کے خلاف دہشت گردی کی کارروائیوں کیلئے افغان سرزمین استعمال کرنے کی اجازت نہیں دے گی۔

یاد رہے کہ اس سے قبل 11 جنوری 2025 کو بلوچستان کے ضلع ژوب کے علاقے سمبازہ میں دہشت گردی میں ملوث ایک افغان شہری کو ہلاک کیا گیا تھا۔