سارک کی اہمیت ختم ہوگئی

سارک (جنوبی ایشیائی علاقائی تعاون کی تنظیم) کو 2016 سے ایک ایسی صورتحال کا سامنا ہے جس میں کوئی بھی پیش رفت ناممکن ہے، یہ ایک ایسی حقیقت ہے جس نے نئی دہلی کے لئے بمسٹیک (خلیج بنگال انیشی ایٹو فار ملٹی سیکٹرل ٹیکنیکل اینڈ اکنامک کوآپریشن) کو علاقائی تعاون کے متبادل فورم کے طور پر فروغ دینے کا موقع فراہم کیا ہے۔

بمسٹیک سات ممالک پر مشتمل ہے جن میں سارک کے آٹھ رکن ممالک میں سے پانچ شامل ہیں۔ اس میں بنگلہ دیش، بھوٹان، سری لنکا، میانمار، نیپال اور تھائی لینڈ شامل ہیں۔ اس میں پاکستان کو شامل نہیں کیا گیا ہے جس پر بھارت سارک کے فریم ورک کے تحت علاقائی رابطوں کے منصوبوں کو روکنے کا الزام لگاتا رہا ہے۔

مودی سرکار بنگلورو میں بمسٹیک انرجی سینٹر (بی ای سی) چاہتی ہے جو بھارت، بنگلہ دیش، بھوٹان، سری لنکا، میانمار، نیپال اور تھائی لینڈ کے درمیان اس شعبے میں علاقائی تعاون کو فروغ دے گا۔ حکومت ہند نے ”میزبان ملک کے معاہدے“ پر دستخط کیے ہیں۔

سارک کے تحت یہ کام اصل میں مارچ 2006 میں اسلام آباد میں قائم سارک انرجی سینٹر کو تفویض کیا گیا تھا، جس کے بارے میں اب بھارت کا دعویٰ ہے کہ وہ گزشتہ 18 سالوں میں اس مقصد کو حاصل کرنے میں ناکام رہا ہے۔

بنگلورو میں بی ای سی علاقائی توانائی کے ڈیٹا بیس کا انتظام کرے گا، انٹرا بمسٹیک منصوبوں کے لئے فزیبلٹی اسٹڈیز کرے گا اور بمسٹیک رکن ممالک کی قومی ایجنسیوں کے درمیان نیٹ ورکنگ کے لئے ایک فریم ورک تیار کرکے تعاون میں اضافہ کرے گا۔ یہ گرڈ انٹر کنکشنز، قابل تجدید توانائی کی ترقی اور توانائی کی کارکردگی کے حصول کے ذریعے توانائی کے تحفظ کو بھی فروغ دے گا۔

بمسٹیک اب بجلی کی ترسیل اور تجارت، بجلی کے تبادلے اور ٹیرف میکانزم کے لئے پالیسیوں کو حتمی شکل دینے پر کام کر رہا ہے۔ بلاک کے اندر بمسٹیک گرڈ انٹرکنکشن ماسٹر پلان بھی زیر غور ہے۔

ڈھاکہ میں بمسٹیک سیکریٹریٹ کے مطابق اس کے علاوہ مرکز توانائی کے شعبے میں تربیت کے لئے صلاحیت سازی، سرحد پار سرمایہ کاری اور بنیادی ڈھانچے کی ترقی کو فروغ دے گا۔

بِمسٹیک سیکریٹریٹ کے مطابق، توانائی کے تعاون کا مقصد “قابل تجدید توانائی کو فروغ دینا، توانائی کی کارکردگی کو بہتر بنانا، سرحد پار توانائی کی تجارت کو فروغ دینا اور گرڈ انٹرکنکشن شروع کرنے پر مرکوز ہے جس کا مقصد توانائی کا تحفظ یقینی بنانا، گرین انرجی کی طرف منتقلی اور خلیج بنگال میں پائیدار ترقی ہے۔

بھارت کی قیادت میں ان تمام اقدامات کا مطلب یہ ہے کہ اس جنوبی ایشیائی خطے کی توانائی کی حفاظت بھارت کے ہاتھوں میں رہے گی اور بھارت کو ان ممالک کے توانائی کے وسائل، خاص طور پر بھوٹان اور نیپال کے پن بجلی کے وسائل سے فائدہ اٹھانے تک رسائی حاصل ہوگی۔ یہ ہندوستان کے لئے خطے میں توانائی کی مارکیٹ پر اجارہ داری قائم کرنے کے راستے بھی کھولتا ہے۔ اس کی بہترین مثال بنگلہ دیش کی ہے۔

بنگلہ دیش اپنی بجلی کی ضروریات کے لئے بنیادی طور پر بھارت پر انحصار کرتا ہے۔ 25 سالہ معاہدے کے تحت بنگلہ دیش اپریل 2023 سے اڈانی گروپ آف انڈیا سے بجلی حاصل کر رہا ہے جبکہ دیگر بھارتی پلانٹس سے تقریبا 1160 میگاواٹ بجلی حاصل کی جا رہی ہے۔

بنگلہ دیش پاور ڈیولپمنٹ بورڈ کے ایک عہدیدار نے مالی سال 2023/24 کی تازہ ترین آڈٹ رپورٹ کا حوالہ دیتے ہوئے کہا کہ اڈانی بجلی کی قیمت بنگلہ دیش میں تقریبا 12 ٹکا (0.1008 امریکی ڈالر) فی یونٹ ہے۔ انہوں نے مزید کہا کہ یہ بھارت کے دیگر نجی پروڈیوسروں کی شرح سے 27 فیصد زیادہ ہے اور بھارت ریاستی ملکیت والے پلانٹس سے 63 فیصد زیادہ ہے۔ بنگلہ دیش کے لئے یہ ناقابل برداشت ہوتا جا رہا ہے۔

ڈھاکہ اڈانی پاور کو 800 ملین ڈالر کے واجبات کی ادائیگی کے لئے سخت مشکلات کا سامنا کررہا ہے جبکہ ملک پر بھارتی پاور کمپنیوں کے ایک بلین ڈالر سے زیادہ واجبات ہیں کیونکہ ادائیگی کرنے کے لئے ڈالر تک رسائی حاصل کرنے میں دشواری ہے۔

اڈانی پاور کے ترجمان نے کہا کہ ہم بڑھتے ہوئے واجبات کے باوجود بنگلہ دیش کو بجلی کی فراہمی جاری رکھے ہوئے ہیں جو تشویش کا باعث ہے اور پلانٹ کے آپریشنز کو غیر مستحکم بنا رہا ہے۔ حال ہی میں اطلاعات ہیں کہ پاور کمپنی نے مضبوط ہتھکنڈوں کا سہارا لیا ہے اور اپنی وصولیوں کے لئے بنگلہ دیش کو بجلی کی فراہمی کو منظم طریقے سے کم کرنا شروع کر دیا ہے۔

پاکستان اور بھارت کے درمیان دشمنی کی وجہ سے سارک اپنے مقاصد حاصل کرنے میں ناکام رہا۔ اس کی زیادہ تر ناکامی ڈیزائن کی وجہ سے تھی۔

سال 2016 میں سارک کا عملی طور پر خاتمہ ہوگیا جب 2016 میں اسلام آباد میں ہونے والے سارک اجلاس کو اس وقت کی مسلم لیگ (ن) کی حکومت نے منسوخ کرنا پڑا کیونکہ بھارتی وزیر اعظم نریندر مودی نے اسلام آباد میں ہونے والی 19ویں سارک کانفرنس میں شرکت نہ کرنے کا فیصلہ کیا تھا جس کا جواز انہوں نے بھارت میں دہشت گردوں کے حملوں کو قرار دیا تھا جو مبینہ طور پر پاکستان میں مقیم تھے۔ اس دوران، کچھ دیگر جنوبی ایشیائی رہنماؤں نے بھی مودی کے فیصلے کی حمایت کرتے ہوئے کانفرنس میں شرکت سے انکار کیا۔

اس کے بعد بھارت نے سارک کو ترک کر دیا اور بمسٹیک کے ساتھ آگے بڑھا۔ اس کا بنیادی مقصد پاکستان کو علاقے سے الگ کرنا اور جنوبی ایشیائی ممالک پر بھارت کی اجارہ داری کو قائم رکھنا تھا۔

پاکستان کو عالمی منظر نامے سے الگ تھلگ کرنے کے بھارت کے مذموم عزائم جاری اور کامیاب ہیں۔ روس میں ہونے والے حالیہ برکس اجلاس میں پاکستان برکس کی رکنیت حاصل نہیں کرسکا کیونکہ چین اور روس کی موجودگی کے باوجود بھارت کی مخالفت غالب تھی۔ پاکستان کا یہ دعویٰ کہ وہ چین کے اہم بیلٹ اینڈ روڈ منصوبے —چین پاکستان اقتصادی راہداری— کی میزبانی کر رہا ہے، اس کے باوجود پاکستان برکس کا رکن بنننے میں کامیاب نہیں ہو سکا۔ اس کے برعکس، ایسے ممالک جن کے پاس پاکستان سے کہیں کم تر اسناد تھیں، برکس کی رکنیت حاصل کرنے میں کامیاب ہو گئے۔

ایسا لگتا ہے کہ پاکستان عالمی سفارتکاری اور اقتصادی نقطہ نظر میں اپنی عالمی رسائی اور اہمیت کھو چکا ہے۔ اسے نئے سرے سے دیکھنے کی ضرورت ہے اور بنیادی طور پر ایشیا، مشرق وسطیٰ اور یورپ میں سیاسی اور معاشی صف بندیوں کے حوالے سے اپنی اہمیت کو دوبارہ حاصل کرنے کے لیے ضروری حکمت عملی وضع کرنے کی ضرورت ہے۔ دوسرا چیلنج یہ ہے کہ جہاں تک امریکہ، چین اور روس کے ساتھ اس کے تعلقات کا معاملہ ہے تو ایک نازک توازن قائم کیا جائے۔ اس وقت بنگلہ دیش کی حکومت کے بھارت کے ساتھ کشیدہ تعلقات پاکستان کو ڈھاکہ کے ساتھ اپنے سفارتی اور اقتصادی تعلقات کو بہتر بنانے اور جنوبی ایشیا کے خطے میں قدم جمانے کا موقع فراہم کرتے ہیں۔ یہ ایک ایسا وقت ہے جب بنگلہ دیش کو قابل اعتماد اتحادیوں کی ضرورت ہے، اور پاکستان اس طرح کا ایک اتحادی بن سکتا ہے. پاکستان کو یہ موقع ضائع نہیں کرنا چاہیے۔