سرمایہ کاری کا فروغ حکومت کی اولین ترجیح ہے، شہباز شریف

وزیراعظم شہباز شریف نے چینی صنعتوں کی پاکستان منتقلی کے حوالے سے چینی اور پاکستانی کمپنیوں کے درمیان مشترکہ کاروباری منصوبے کی منظوری دیتے ہوئے کہا ہے کہ پاکستان میں سرمایہ کاری کو فروغ دینا ان کی حکومت کی اولین ترجیح ہے۔

وزیراعظم نے یہ منظوری اسلام آباد میں بورڈ آف انویسٹمنٹ سے متعلق اعلیٰ سطح اجلاس کی صدارت کرتے ہوئے دی۔

انہوں نے دورہ چین کے دوران شینزن میں پاکستانی اور چینی کمپنیوں کے درمیان طے پانے والے مفاہمت کی یادداشت پر ہونے والی پیش رفت کی جامع رپورٹ پیش کرنے کی بھی ہدایت کی۔

وزیراعظم شہباز شریف نے اپنے حالیہ دورہ چین کے بعد ہونے والی پیش رفت کے تناظر میں اسپیشل اکنامک زونز ون اسٹاپ شاپ قانون پر نظر ثانی کی ہدایت کی۔

انہوں نے زور دیا کہ چین کی ٹیکسٹائل، چمڑے، جوتے اور دیگر صنعتوں کو پاکستان میں منتقل کرنے کے بہت زیادہ امکانات ہیں۔

اجلاس کو بریفنگ دیتے ہوئے سرمایہ کاری بورڈ کے سیکرٹری نے کہا کہ پاکستان میں چینی صنعتوں کی منتقلی کے حوالے سے اقدامات کیے جا رہے ہیں۔

سیکرٹری نے کہا کہ اسلام آباد بزنس سہولت سینٹر کے قیام کے لیے چینی ماہرین کی خدمات حاصل کی جا رہی ہیں۔

اجلاس میں مزید بتایا گیا کہ ایز آف ڈوئنگ بزنس ایکٹ کے حوالے سے ایک مسودہ بھی جلد کابینہ کمیٹی برائے قانون سازی امور کو بھیجا جا رہا ہے۔