دفتر خارجہ کا اقوام متحدہ میں بھارتی بیان پر سخت ردعمل، پاکستان کی معدنی ترقی کی مخالفت کا الزام
- ترجمان دفتر خارجہ کا اقوام متحدہ میں بھارتی الزامات مسترد کرتے ہوئے بلوچستان اور خیبر پختونخوا میں دہشت گردی کی سرپرستی اور پاکستان کی معدنی ترقی سبوتاژ کرنے کا الزام، سندھ طاس معاہدے پر بھی بھارت کو تنقید کا نشانہ بنایا
پاکستان کے دفتر خارجہ نے بھارت پر پاکستان کے معدنی وسائل کی ترقی کی مخالفت اور ملک کو عدم استحکام سے دوچار کرنے کی کوششوں کا الزام عائد کیا ہے۔ دفتر خارجہ نے اقوام متحدہ میں نئی دہلی کی جانب سے دیے گئے بیانات کو ’’غیر سفارتی اور غیر ذمہ دارانہ‘‘ قرار دیتے ہوئے مسترد کر دیا۔
ہفتہ وار میڈیا بریفنگ کے دوران ایک سوال کا جواب دیتے ہوئے دفتر خارجہ کے ترجمان سجاد حیدر خان نے کہا کہ پاکستان نے ایسے شواہد پیش کیے ہیں جن سے ظاہر ہوتا ہے کہ بھارت بلوچستان اور خیبر پختونخوا میں دہشت گردی کی سرپرستی کر رہا ہے تاکہ ان دونوں صوبوں میں ترقیاتی عمل کو متاثر کیا جا سکے، جہاں ملک کے بیشتر معدنی ذخائر واقع ہیں۔
انہوں نے کہا کہ اقوام متحدہ میں بھارت کے بیانات پاکستان کے اداروں اور قیادت کے خلاف بے بنیاد الزامات پر مشتمل تھے، جو پاکستان کے داخلی معاملات میں مداخلت اور اقوام متحدہ کے منشور کے منافی ہیں۔ انہوں نے مزید کہا کہ اسی اجلاس میں پاکستان کے نمائندے نے بھارتی الزامات کا بھرپور جواب دیا۔
ترجمان نے کہا کہ بھارت کو اپنے اداروں کے بارے میں بے بنیاد اشارے دینے کے بجائے پاکستان کے ان تحفظات کا جواب دینا چاہیے جنہیں اسلام آباد ’’آبی دہشت گردی‘‘ قرار دیتا ہے۔
انہوں نے کہا کہ بھارت کے الزامات کا مقصد عالمی سطح پر اپنی تنہائی چھپانا اور ملک کی اندرونی صورت حال سے توجہ ہٹانا ہے، جہاں ان کے بقول ہندوتوا سے متاثر انتہا پسندی فروغ پا رہی ہے۔
سندھ طاس معاہدہ
سندھ طاس معاہدے کے حوالے سے سجاد حیدر خان نے بھارت کے اس فیصلے کو غیر قانونی اور یکطرفہ قرار دیا جس کے تحت نئی دہلی نے معاہدے کو ’’غیر فعال‘‘ رکھنے کا اعلان کیا ہے۔
انہوں نے کہا کہ ثالثی عدالت نے 31 اگست 2026 کو فیصلہ دیا تھا کہ سندھ طاس معاہدہ بدستور پابند اور مکمل طور پر نافذالعمل ہے۔ ان کے مطابق، بھارت کی جانب سے اس فیصلے کو تسلیم کرنے سے انکار بین الاقوامی قانون سے اس کی وابستگی پر سوالات اٹھاتا ہے۔
ترجمان نے بھارت پر زور دیا کہ وہ جموں و کشمیر سے متعلق اقوام متحدہ کی سلامتی کونسل کی قراردادوں پر عمل درآمد کرے اور مقبوضہ علاقے میں انسانی حقوق کی خلاف ورزیاں بند کرے۔
انہوں نے کہا کہ بھارت کو دوسروں پر تنقید کا کوئی حق حاصل نہیں۔ ان کے بقول، بھارت اقوام متحدہ کے منشور، سلامتی کونسل کی قراردادوں، اپنے ہمسایہ ممالک کی خودمختاری اور معاہدوں کے تحت اپنی ذمہ داریوں کی خلاف ورزی کر رہا ہے، جبکہ غلط معلومات پھیلانے اور دہشت گردی کو ریاستی پالیسی کے طور پر استعمال کر رہا ہے۔
سکھ یاتری، ای سی او اجلاس
ترجمان نے بتایا کہ بابا گورو نانک کے جنم دن کی تقریبات میں شرکت کے لیے بھارت سے تقریباً 2 ہزار 700 سکھ یاتریوں کی آمد متوقع ہے۔
اسلام آباد میں اقتصادی تعاون تنظیم (ای سی او) کے اجلاس سے متعلق سوال پر انہوں نے کہا کہ افغانستان کو اجلاس میں مدعو نہیں کیا گیا، کیونکہ پاکستان نے موجودہ افغان حکومت کو تسلیم نہیں کیا۔ ان کے مطابق، ای سی او فورم کے سیکریٹریٹ میں افغانستان کی رکنیت بھی معطل ہے، جبکہ وزارتی سطح پر شرکت کا فیصلہ میزبان ممالک کرتے ہیں۔
انہوں نے کہا کہ پاکستان چاہتا ہے کہ افغانستان ای سی او کے دائرہ کار میں مکمل طور پر شامل ہو اور اپنے ہمسایہ ممالک کے ساتھ امن سے رہے۔ ان کے بقول، اس مقصد کے لیے افغان حکام کو اپنے ہمسایہ ممالک کے سکیورٹی خدشات، بالخصوص افغان سرزمین سے ہونے والی دہشت گردی، کا ازالہ کرنا ہوگا۔


Comments