چنگیز انرجی اور پاکستانی کاروباری کنسورشیم کے درمیان ڈسکوز کی نجکاری کے لیے ایم او یو پر دستخط
- چنگیز ہولڈنگ کے ذیلی ادارے اور آرٹسٹک ملنرز، فاطمہ گروپ سمیت پانچ پاکستانی کاروباری گروپس پر مشتمل کنسورشیم کی فیسکو، گیپکو اور آئیسکو میں سرمایہ کاری کے مواقع تلاش کرنے کے لیے شراکت داری
ترکیہ کے صنعتی گروپ چنگیز ہولڈنگ کے ذیلی ادارے چنگیز انرجی نے ملک کے بجلی کی تقسیم کے شعبے میں سرمایہ کاری کے مواقع تلاش کرنے کے لیے پاکستان کے پانچ بڑے کاروباری گروپس پر مشتمل کنسورشیم کے ساتھ مفاہمتی یادداشت (ایم او یو) پر دستخط کیے ہیں۔ جمعرات کے روز جاری کردہ ایک بیان میں یہ بات بتائی گئی ہے۔
پاکستانی کنسورشیم میں آرٹسٹک ملنرز (پرائیویٹ) لمیٹڈ، فاطمہ گروپ، لیک سٹی، ڈی آئی این گروپ اور فضل گروپ شامل ہیں۔
اس اسٹریٹجک شراکت داری کا مقصد پاکستان کے جاری بجلی کے شعبے کی نجکاری پروگرام کے تحت مشترکہ طور پر سرمایہ کاری کے مواقع سے فائدہ اٹھانا ہے، بالخصوص فیصل آباد الیکٹرک سپلائی کمپنی (فیسکو)، گوجرانوالہ الیکٹرک پاور کمپنی (گیپکو) اور اسلام آباد الیکٹرک سپلائی کمپنی (آئیسکو) سے متعلق مواقع پر توجہ مرکوز کرنا ہے۔
بیان میں کہا گیا کہ ’’یہ شراکت داری توانائی اور بنیادی ڈھانچے کی ترقی کے شعبوں میں چنگیز ہولڈنگ کے بین الاقوامی تجربے، جس کا ذیلی ادارہ چنگیز انرجی بھی ہے، کو پاکستانی کنسورشیم کی مقامی مارکیٹ سے واقفیت، صنعتی مہارت اور سرمایہ کاری کی صلاحیتوں کے ساتھ یکجا کرتی ہے۔
بیان کے مطابق، ’’اس شراکت داری کے ذریعے فریقین کا ارادہ ہے کہ بین الاقوامی مہارت اور مقامی صلاحیتوں کو یکجا کرکے پاکستان کے بجلی کی تقسیم کے شعبے میں بہتری کے عمل میں معاونت فراہم کریں، تاکہ آپریشنل کارکردگی بہتر بنائی جاسکے، تکنیکی اور تجارتی نقصانات کم کیے جاسکیں، خدمات کی قابلِ اعتماد فراہمی یقینی بنائی جاسکے اور تقسیم کے بنیادی ڈھانچے میں پائیدار اور طویل مدتی سرمایہ کاری کو فروغ دیا جاسکے۔‘‘


Comments