پاکستان اور سعودی عرب کا جی سی سی آزاد تجارتی معاہدے پر جلد دستخط اور عمل درآمد پر زور
- وفاقی وزیر تجارت نے کہا کہ یہ معاہدہ منڈیوں تک رسائی بہتر بنانے کا ایک اہم موقع فراہم کرے گا
پاکستان سعودی عرب کے ساتھ تجارتی تعلقات مزید مضبوط بنانے کے لیے مجوزہ پاکستان۔خلیج تعاون کونسل (جی سی سی) آزاد تجارتی معاہدے پر جلد دستخط کا خواہاں ہے، جس سے پاکستانی برآمد کنندگان کو منڈیوں تک بہتر رسائی اور کاروبار کے نئے مواقع میسر آنے کی توقع ہے۔
یہ پیش رفت پاکستان میں سعودی عرب کے نو تعینات سفیر ڈاکٹر راجح بن طامی البقمی اور وفاقی وزیر تجارت جام کمال خان کے درمیان اسلام آباد میں ان کے دفتر میں ہونے والی ملاقات کے دوران سامنے آئی ہے۔ ہفتے کے روز جاری کردہ بیان کے مطابق، دونوں رہنماؤں نے تجارتی اور اقتصادی تعاون کے فروغ پر تبادلہ خیال کیا۔
سعودی سفیر کا خیرمقدم کرتے ہوئے جام کمال خان نے سعودی عرب کے ساتھ پاکستان کے دیرینہ اور تاریخی تعلقات کی توثیق کی۔ انہوں نے کہا کہ حکومت پاکستان نے گزشتہ تین برس کے دوران حکومتی، کاروباری اور عوامی سطح پر روابط بڑھا کر دوطرفہ تعلقات مزید مستحکم بنانے کے لیے مسلسل کوششیں کی ہیں۔
دونوں فریقین نے پاکستان اور خلیج تعاون کونسل (جی سی سی) کے درمیان آزاد تجارتی معاہدے پر جلد دستخط اور اس پر عمل درآمد کے امور پر تبادلہ خیال کیا۔ وزیر تجارت نے کہا کہ یہ معاہدہ منڈیوں تک رسائی بہتر بنانے، دوطرفہ تجارت بڑھانے اور اقتصادی روابط مضبوط کرنے کا اہم موقع فراہم کرے گا۔
جام کمال خان نے زور دیا کہ دونوں ممالک کے دیرینہ تعلقات اقتصادی انضمام کے فروغ کے وسیع مواقع فراہم کرتے ہیں، خصوصاً سعودی عرب کے وژن 2030 کے تحت معیشت میں تنوع لانے کی کوششوں اور پاکستان کی پیداواری و صنعتی صلاحیتوں کے تناظر میں۔
انہوں نے پیداوار بڑھانے، مصنوعات کا معیار بہتر بنانے، جدید ٹیکنالوجی اپنانے اور صنعتی مسابقت مضبوط کرنے کے شعبوں میں تعاون کے امکانات اجاگر کیے۔ ان کا کہنا تھا کہ ان شعبوں میں اشتراک سے پاکستانی کاروباری ادارے سعودی منڈی کی ضروریات بہتر انداز میں پوری کرسکیں گے، جبکہ دونوں ممالک کے لیے باہمی مفاد کے معاشی مواقع بھی پیدا ہوں گے۔
وزیر تجارت نے پاکستان کی برآمدات کا دائرہ وسیع کرنے اور نجی شعبے کے درمیان شراکت داری مضبوط بنانے کی اہمیت پر بھی زور دیا تاکہ بڑھتے ہوئے اقتصادی روابط کو ٹھوس تجارتی نتائج میں تبدیل کیا جاسکے۔
ملاقات کے دوران سعودی سفیر نے دونوں ممالک کے درمیان دیرینہ برادرانہ تعلقات کی توثیق کرتے ہوئے دوطرفہ اقتصادی روابط مضبوط بنانے کے لیے مسلسل تعاون کی یقین دہانی کرائی۔
انہوں نے علاقائی روابط اور تعاون کے فروغ، بالخصوص زرعی شعبے میں اشتراک کے امکانات کو بھی اجاگر کیا۔
سعودی سفیر نے اقتصادی تعاون کو وسعت دینے اور باہمی مفاد پر مبنی نئی شراکت داریوں کے مواقع تلاش کرنے کے لیے وزارت تجارت کے ساتھ قریبی روابط برقرار رکھنے کے عزم کا اظہار کیا۔
دونوں فریقین نے دوطرفہ تجارت، سرمایہ کاری اور زرعی تعاون کے فروغ کے لیے باقاعدہ رابطے اور مشاورت جاری رکھنے پر اتفاق کیا، تاکہ دیرینہ دوستانہ تعلقات کو مضبوط اقتصادی روابط میں تبدیل کیا جاسکے۔
Comments