ڈالر کے مقابلے میں روپیہ مزید مضبوط

انٹربینک مارکیٹ میں جمعرات کو بھی ڈالر کے مقابلے میں روپے کی قدر میں بہتری کا سلسلہ جاری رہا۔

اسٹیٹ بینک کے مطابق کاروبار کے اختتام پر مقامی کرنسی ایک پیسے کے اضافے سے 276.85 روپے فی ڈالر پر بند ہوئی۔

یاد رہے کہ بدھ کو انٹربینک مارکیٹ میں مقامی کرنسی 276.86 روپے پر بند ہوئی تھی۔

عالمی منڈی میں امریکی ڈالر کی قدر میں جاری کمی کا سلسلہ رک گیا، کیونکہ سرمایہ کار آئندہ ہفتے جاپان، امریکہ اور یورپ کے مرکزی بینکوں کے اہم اجلاسوں سے قبل محتاط انداز اپنا رہے ہیں۔

کرنسی مارکیٹ میں امریکی معیشت کی مضبوطی اور مصنوعی ذہانت (اے آئی) کی بڑھتی ہوئی مانگ کی بدولت ڈالر کی مانگ اب بھی مضبوط ہے، جس سے طویل عرصے تک شرح سود بلند رہنے کی توقعات کو تقویت مل رہی ہے۔

دوسری جانب برطانیہ میں توقع سے زیادہ افراط زر کے باعث پاؤنڈ اسٹرلنگ کی قدر 1.3395 ڈالر پر مستحکم رہی، جبکہ آسٹریلین ڈالر 0.7025 ڈالر کی سطح پر موجود رہا۔ نیوزی لینڈ میں آئندہ ہفتے شرح سود میں اضافے کی توقعات کے باعث کیوی ڈالر ایک ماہ کی بلند ترین سطح 0.5709 پر پہنچ گیا۔

یورو اور جاپانی ین محدود حد میں رہے۔ جاپانی ین 158 فی ڈالر کے قریب رہا، جبکہ یورو 1.12 ڈالر سے اوپر مستحکم رہا، حالانکہ فرانس میں مالیاتی بحران اور احتجاجی مظاہروں کے باعث یورو پر دباؤ موجود ہے۔