تیسری سہ ماہی میں وولکس ویگن کی عالمی ترسیل گرگئی

وولکس ویگن نے پیر کو بتایا کہ رواں سال کی تیسری سہ ماہی میں عالمی سطح پر گاڑیوں کی ترسیل میں 14.3 فیصد کمی ریکارڈ کی گئی جس کی بڑی وجہ چینی مارکیٹ میں طلب میں مزید کمی ہے۔

گاڑیوں کی فروخت کا اہم اشاریہ سمجھی جانے والی ترسیلات رواں سہ ماہی میں کم ہوکر 18 لاکھ 90 ہزار (1.89 ملین) گاڑیاں رہ گئیں۔

وولکس ویگن کے توسیع شدہ ایگزیکٹو بورڈ کے رکن مارٹن سینڈر نے ایک بیان میں کہا کہ چین کی مجموعی مارکیٹ میں تیزی سے آنے والی گراوٹ بدستور پوری آٹو انڈسٹری کے لیے ایک بڑا چیلنج ہے۔

وولکس ویگن کی سب سے بڑی منڈی چین میں رواں سہ ماہی کے دوران گاڑیوں کی ترسیل میں 38.5 فیصد کی نمایاں کمی ریکارڈ کی گئی جبکہ جنوری سے اب تک یہ کمی 30.2 فیصد تک پہنچ چکی ہے۔

کار ساز کمپنی کے مطابق شمالی امریکا میں گاڑیوں کی ترسیل 5.8 فیصد اور مغربی یورپ میں 2.8 فیصد گھٹ گئی، تاہم وسطی اور مشرقی یورپ میں اس میں 1.4 فیصد اضافہ ہوا۔