کراچی کی صنعت و تجارت کیلئے چارٹر آف ڈیمانڈز کی تجویز

کورنگی ایسوسی ایشن آف ٹریڈ اینڈ انڈسٹری (کاٹی) کے صدر محمد اکرام راجپوت نے تجویز دی ہے کہ کراچی کی تمام کاروباری برادری، تجارتی تنظیمیں اور صنعتی ایسوسی ایشنز مشترکہ طور پر ایک چارٹر آف ڈیمانڈز تیار کریں اور ایک مضبوط مشترکہ کمیٹی قائم کریں جو وفاقی، صوبائی اور بلدیاتی حکومتوں سمیت دیگر متعلقہ اداروں اور فورمز کے سامنے صنعتکاروں اور تاجروں کے مفادات کی مؤثر نمائندگی کرسکے۔

کراچی چیمبر کے انتخابات میں بزنس مین گروپ (بی ایم جی) کی مکمل حمایت کا اعلان کرتے ہوئے اکرام راجپوت نے کہا کہ کراچی پاکستان کی معاشی شہ رگ ہے۔ انہوں نے کہا کہ شہر کی صنعتیں نہ صرف لاکھوں افراد کو روزگار فراہم کرتی ہیں بلکہ ملک کی برآمدات، ٹیکس آمدنی اور مجموعی معاشی سرگرمیوں میں بھی بنیادی کردار ادا کرتی ہیں۔

تاہم انہوں نے افسوس کا اظہار کیا کہ کراچی کے صنعتی اور کاروباری شعبے اس وقت متعدد سنگین چیلنجز کا سامنا کررہے ہیں اور ان مسائل کے حل کے بغیر پائیدار صنعتی و معاشی ترقی مشکل رہے گی۔

انہوں نے کہا کہ صنعت اور تجارت کو کئی بنیادی چیلنجز کا سامنا ہے جنہیں محض مطالبات کے ذریعے حل نہیں کیا جاسکتا بلکہ ان کے لیے حکومت اور کاروباری برادری کے درمیان تعاون ضروری ہے۔

انہوں نے کہا کہ بی ایم جی کے چیئرمین زبیر موتی والا اور کراچی چیمبر کے صدر ریحان حنیف کی قیادت میں نمایاں کام کیا گیا ہے۔

انہوں نے بالخصوص گل پلازہ سانحے سے متاثرہ دکانداروں اور تاجروں کے حقوق کے حصول میں کراچی چیمبر کے اہم کردار کو سراہا۔

ڈپٹی پیٹرن ان چیف زبیر چھایا نے کہا کہ کاٹی کے مرحوم سابق پیٹرن ان چیف ایس ایم منیر نے بی ایم جی کے قیام میں اہم کردار ادا کیا تھا۔

انہوں نے کہا کہ کراچی کی مارکیٹوں میں حادثات کے بعد تاجروں کے لیے معاوضے کے حصول میں کراچی چیمبر کا کردار قابلِ تحسین ہے۔