پاکستان اور لبنان سفارتی، سکیورٹی تعلقات مزید مضبوط بنانے پر متفق

لبنان کے وزیر داخلہ احمد الحجار نے اسلام آباد میں پاکستانی حکام سے ملاقاتیں کیں، جن میں نائب وزیراعظم و وزیر خارجہ اسحاق ڈار اور وزیر داخلہ محسن نقوی بھی شامل تھے۔ دونوں جانب سے سکیورٹی، قانون نافذ کرنے والے اداروں اور سفارتی تعلقات کے شعبوں میں تعاون مزید بڑھانے پر اتفاق کیا گیا۔

وزارت خارجہ کی جانب سے ایکس پر جاری بیان کے مطابق احمد الحجار کا وزارت خارجہ میں اسحاق ڈار نے استقبال کیا، اس موقع پر محسن نقوی، طلال چوہدری اور وزارت خارجہ کے اعلیٰ حکام بھی موجود تھے۔

اسحاق ڈار نے لبنان کی خودمختاری، اتحاد اور علاقائی سالمیت کے لیے پاکستان کی مستقل حمایت کا اعادہ کیا اور قانون نافذ کرنے والے اداروں کے درمیان تعاون سمیت عوامی سطح پر روابط کے ذریعے دوطرفہ تعلقات مزید مضبوط بنانے کی خواہش کا اظہار کیا۔

دونوں وزرا نے پاکستان اور لبنان کے تعلقات اور قانون نافذ کرنے کے شعبے میں تعاون پر تبادلہ خیال کیا اور سزا یافتہ افراد کی منتقلی سے متعلق معاہدے پر دستخط کو دوطرفہ قانونی تعاون میں اہم پیش رفت قرار دیا۔ انہوں نے باہمی دلچسپی کے علاقائی اور عالمی امور پر بھی تبادلہ خیال کیا۔

احمد الحجار نے علاقائی امن و استحکام کے فروغ میں پاکستان کے کردار کو سراہا اور مکہ مشترکہ دفاعی معاہدے پر پاکستان کو مبارکباد دی۔ دونوں جانب سے باہمی دلچسپی کے تمام شعبوں میں دوطرفہ تعاون مزید بڑھانے کی خواہش کا اظہار کیا گیا۔

لبنانی وزیر داخلہ نے اس سے قبل وزارت داخلہ میں محسن نقوی سے بھی ملاقات کی، جس میں دونوں وزرا نے پہلے انفرادی طور پر بات چیت کی، جس کے بعد وفود کی سطح پر دوطرفہ سکیورٹی تعاون اور انسداد دہشت گردی سے متعلق امور پر تبادلہ خیال کیا گیا۔

دونوں ممالک نے دہشت گردی، منشیات اسمگلنگ، غیر قانونی امیگریشن، منی لانڈرنگ اور سائبر جرائم کے خلاف تعاون بڑھانے اور دہشت گردوں و منشیات کے نیٹ ورکس کے خلاف انٹیلی جنس معلومات کے تبادلے کو مضبوط بنانے پر اتفاق کیا۔ پولیس اکیڈمیوں کے درمیان تعاون، علاقائی صورتحال اور خطے میں پائیدار امن کے فروغ کے لیے پاکستان کی کوششوں پر بھی تبادلہ خیال کیا گیا۔

دونوں ممالک نے اپنے وزارت داخلہ کے درمیان جلد مفاہمتی یادداشت (ایم او یو) پر دستخط کرنے اور دوطرفہ تعاون بڑھانے کے لیے فوکل پرسنز مقرر کرنے پر اتفاق کیا، جبکہ انسداد منشیات سے متعلق موجودہ مفاہمتی یادداشت پر مکمل عملدرآمد کے عزم کا اعادہ کیا۔ دونوں جانب سے سفارتی اور سرکاری پاسپورٹ رکھنے والوں کے لیے ویزا فری داخلے کی تجویز پر بھی بات چیت کی گئی۔

محسن نقوی نے لبنانی وزیر کے دورے کو خوش آئند پیش رفت قرار دیا، جبکہ احمد الحجار نے پاکستان کی مہمان نوازی پر شکریہ ادا کرتے ہوئے کہا کہ لبنان پاکستان کو برادر ملک سمجھتا ہے اور داخلی سکیورٹی کے شعبے میں باہمی تجربات سے فائدہ اٹھانا چاہتا ہے۔

وزارت داخلہ میں ہونے والے اجلاس میں وزیر مملکت برائے داخلہ طلال چوہدری، وفاقی سیکریٹری داخلہ، چیئرمین نادرا اور ڈی جی ایف آئی اے، ڈی جی اے این ایف، آئی جی فیڈرل کانسٹیبلری، نیکٹا کے نیشنل کوآرڈینیٹر، ڈی جی پاسپورٹس و امیگریشن، چیف کمشنر اسلام آباد، آئی جی اسلام آباد پولیس اور ڈی جی نیشنل فرانزک ایجنسی سمیت دیگر اعلیٰ حکام نے شرکت کی۔