درآمد شدہ اضافی چینی کے ذخائر، ٹی سی پی نے برآمد کیلئے ٹینڈر جاری کردیا

ٹریڈنگ کارپوریشن آف پاکستان (ٹی سی پی) نے درآمد شدہ سفید ریفائنڈ چینی کے 107,739 میٹرک ٹن ذخیرے کی برآمد کے لیے الیکٹرانک بولیاں طلب کرلی ہیں۔

کابینہ کی اقتصادی رابطہ کمیٹی (ای سی سی) نے اگست کے تیسرے ہفتے میں تقریباً 108,000 میٹرک ٹن اضافی چینی کی برآمد کے لیے بین الاقوامی ٹینڈرز جاری کرنے کی منظوری دی تھی۔

وفاقی حکومت کی ہدایات پر ٹی سی پی نے اب اضافی چینی کی برآمد کے لیے بین الاقوامی ای ٹینڈر جاری کردیا ہے۔ یہ چینی ملک میں ممکنہ قلت سے نمٹنے کے لیے پہلے درآمد کی گئی تھی۔

سرکاری اناج درآمد کنندہ کی جانب سے جاری ٹینڈر نوٹس کے مطابق چینی کی فروخت ٹی سی پی پپری گودام کراچی سے ایکس ورکس بنیاد پر اور جس حالت میں جہاں ہے کی بنیاد پر کی جائے گی۔

ٹی سی پی نے سنگل اسٹیج، ون انویلپ طریقہ کار کے تحت اہل فرموں، کمپنیوں اور دیگر اداروں، بشمول انفرادی بولی دہندگان سے بولیاں طلب کی ہیں۔ ان میں واحد ملکیتی کاروبار، شراکتی فرمیں، نجی و پبلک لمیٹڈ کمپنیاں، ہولڈنگ کمپنیاں، گارنٹی کے تحت محدود کمپنیاں، سرکاری ادارے اور بین الحکومتی تنظیمیں شامل ہیں۔

ڈسپوزل آف پبلک ایسٹس ریگولیشنز 2024 کے تحت تیار کردہ ای ٹینڈر دستاویزات، جن میں تفصیلی شرائط، وضاحتیں اور دیگر تقاضے شامل ہیں، رجسٹرڈ بولی دہندگان کو حکومت کے ای پی اے ڈی ایس وی2.0 پورٹل کے ذریعے دستیاب ہیں۔

ٹی سی پی کے مطابق دستی بولیاں قبول نہیں کی جائیں گی اور تمام بولیاں ای پی اے ڈی ایس وی2.0 کے ذریعے 28 ستمبر 2026 بروز پیر صبح 11 بجے تک جمع کرانا ہوں گی۔ الیکٹرانک بولیاں اسی روز صبح 11:30 بجے آن لائن کھولی جائیں گی۔

واضح رہے کہ ملکی مارکیٹ میں چینی کی قلت دور کرنے کے لیے ای سی سی نے جون 2025 میں 500,000 میٹرک ٹن تک چینی درآمد کرنے کی اجازت دی تھی۔ تاہم ٹی سی پی نے 300,000 میٹرک ٹن چینی درآمد کی، جس میں سے تقریباً 192,000 میٹرک ٹن مقامی مارکیٹ میں فروخت کی گئی، جبکہ تقریباً 108,000 میٹرک ٹن چینی اب بھی ٹی سی پی کے پاس موجود ہے، جسے حکومت نے آئندہ کرشنگ سیزن سے قبل برآمد کرنے کا فیصلہ کیا ہے۔

کاپی رائٹ بزنس ریکارڈر، 2026