پیرس کی ٹیکسٹائل نمائش میں 6 پاکستانی کمپنیوں کی شرکت متوقع

پاکستان کی 6 کمپنیاں ٹیکس ورلڈ اینڈ ایپرل سورسنگ پیرس 2026ء میں شرکت کریں گی جو ٹیکسٹائل اور ملبوسات کے شعبے کی یورپ کی معروف تجارتی نمائشوں میں سے ایک ہے۔ یہ نمائش 31 اگست سے یکم ستمبر تک پیرس لی بورگٹ میں منعقد ہوگی۔

منتظمین کے مطابق سال میں دو بار منعقد ہونے والے اس تجارتی میلے کے 59ویں ایڈیشن میں تقریباً 35 ممالک سے 1,300 کے قریب مینوفیکچررز شرکت کریں گے جو پیشہ ور خریداروں کو کپڑے، ملبوسات، لوازمات اور جدید ٹیکسٹائل حل کے حصول کے لیے ایک جامع پلیٹ فارم فراہم کرے گا۔

ترجمان کے مطابق نمائش میں مضبوط عالمی شرکت ہوگی جس میں پاکستان، بنگلہ دیش، چین، بھارت، ترکیہ، میانمار، جنوبی کوریا، جاپان اور اٹلی سمیت اہم مارکیٹس کی نمائندگی ہوگی جبکہ دنیا بھر کے دیگر بڑے پیداواری مراکز سے بھی مینوفیکچررز اور سپلائرز شرکت کریں گے۔

پاکستان کی شرکت کی تفصیلات بتاتے ہوئے ترجمان نے کہا کہ ٹریڈ ڈیولپمنٹ اتھارٹی آف پاکستان (ٹڈاپ) اپنی خصوصی پویلین کے تحت ایپرل سورسنگ سیکشن میں 5 پاکستانی کمپنیوں، اسد انٹرپرائزز، فیشن چینل، گارمنٹ ریسورسز، رقی اسپورٹس اور زیڈ کے انٹرنیشنل کو سہولت فراہم کرے گی۔

ترجمان نے مزید بتایا کہ پاکستان کی چھٹی کمپنی اے کے ٹریڈرز ٹیکس ورلڈ سیکشن میں آزادانہ طور پر شرکت کرے گی۔

یہ تجارتی نمائش پاکستانی نمائش کنندگان کو اپنی مصنوعات متعارف کرانے، بین الاقوامی خریداروں سے روابط قائم کرنے اور کاروبار کے نئے مواقع تلاش کرنے کا موقع فراہم کرے گی۔