"میرا وقت گزر گیا": نیمار نے برازیل کی قومی ٹیم سے ریٹائرمنٹ کے فیصلے پر دوبارہ مہر ثبت کردی

نیمار نے بین الاقوامی فٹبال سے ریٹائرمنٹ کی تصدیق کا عندیہ دے دیا ہے۔ انہوں نے کہا کہ اب وہ برازیل کی نمائندگی جاری نہیں رکھنا چاہتے۔ یہ بیان انہوں نے اس وقت دیا جب چند ہفتے قبل ورلڈ کپ کے پری کوارٹر فائنل میں ناروے کے ہاتھوں شکست کے بعد وہ اپنے بین الاقوامی کیریئر کے اختتام کا اشارہ دے چکے تھے۔

برازیل کے آل ٹائم ٹاپ اسکورر 34 سالہ فارورڈ نے یہ گفتگو منگل کی رات دیر گئے کوپا سُدامریکانا کے میچ میں سانتوس کی وینزویلا کی یونیورسٹیڈ سینٹرل کے خلاف 4-2 سے کامیابی کے بعد کی۔

انہوں نے صحافیوں سے گفتگو کرتے ہوئے کہا، “میرے خیال میں قومی ٹیم کے ساتھ میرا وقت گزر چکا ہے۔ میں نے وہاں تاریخ رقم کی ہے اور مجھے اس پر بہت خوشی ہے۔ میں نے وہاں بہت کچھ سیکھا، اپنا خون اور زندگی دی، اور ہمیشہ پیلی جرسی کے لیے لڑتا رہا۔ لیکن اب میرا خیال ہے کہ میں مزید یہ سفر جاری نہیں رکھنا چاہتا۔

ان کے اس بیان نے 5 جولائی کو ورلڈ کپ میں ناروے کے ہاتھوں برازیل کی 2-1 سے شکست کے فوراً بعد دیے گئے بیان کو مزید تقویت دی ہے۔

نیمار نے اس میچ میں متبادل کھلاڑی کے طور پر میدان میں اترنے کے بعد انجری ٹائم میں پنالٹی پر گول کیا تھا، تاہم برازیلی نشریاتی ادارے جی ای کو انٹرویو دیتے ہوئے انہوں نے عندیہ دیا تھا کہ ان کا بین الاقوامی کیریئر اختتام کو پہنچ چکا ہے۔

ان کا کہنا تھا کہ ”میں نے کوشش کی، بہت کوشش کی۔ اب یہ سفر ختم ہوچکا ہے،“

شکست کے بعد نیمار واضح طور پر جذباتی نظر آئے۔ یہ برازیل کا 1990 کے بعد ورلڈ کپ میں بدترین ابتدائی اخراج تھا، جبکہ پانچ مرتبہ کی عالمی چیمپئن ٹیم کا ریکارڈ چھٹی بار ٹائٹل جیتنے کا انتظار مزید طویل ہوگیا ہے۔

چار ورلڈ کپ کھیلنے والے اس فارورڈ نے کلب کی سطح پر سانتوس، بارسلونا اور پیرس سینٹ جرمین کے ساتھ شاندار کیریئر گزارا، تاہم قومی ٹیم کے لیے وہ صرف ایک بڑا اعزاز حاصل کرسکے، جو 2013 میں کنفیڈریشنز کپ کی فتح تھی۔

نیمار نے برازیل کی قومی ٹیم کے لیے 130 میچوں میں 80 گول اور 58 اسسٹس کیے۔