انٹربینک مارکیٹ: ڈالر کے مقابلے روپے کی قدر میں اضافہ

انٹربینک مارکیٹ میں جمعرات کو بھی ڈالر کے مقابلے روپے کی قدر میں اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 278.35 روپے پر بند ہوا۔

یاد رہے کہ بدھ کو مقامی کرنسی 278.36 پر بند ہوئی تھی۔

دریں اثنا جمعرات کو ڈالر کی قدر میں عدم استحکام دیکھا گیا کیونکہ مشرقِ وسطیٰ میں امریکہ کے نئے حملوں نے مارکیٹ کی صورتحال کو متاثر کیا جبکہ مئی میں امریکی صارفین کی مہنگائی تین سال کی بلند ترین سطح پر پہنچنے کی وجہ سے سرمایہ کار فیڈرل ریزرو کی مانیٹری پالیسی کے مستقبل کے حوالے سے تشویش کا شکار ہیں۔

یورو 1.1553 ڈالر پر فروخت ہوا جس کے بعد وہ گزشتہ ہفتے ریکارڈ کی گئی اپنی 10 ہفتوں کی کم ترین سطح سے معمولی سا اوپر آیا، تاہم اپریل کے اوائل میں ہونے والے جنگ بندی کے معاہدے کے بعد سے حاصل ہونے والے بیشتر فوائد اب وہ گنوا چکا ہے۔ آج سب کی نظریں یورپی مرکزی بینک کے پالیسی اجلاس پر ہوں گی کیونکہ وہ مہنگائی سے نمٹنے کے لیے شرحِ سود میں اضافے کے لیے بالکل تیار دکھائی دیتا ہے۔

برطانوی پاؤنڈ (اسٹرلنگ) 1.33905 ڈالر پر رہا۔

دوسری جانب امریکی فوج کی طرف سے ایران میں متعدد اہداف کے خلاف فضائی حملے مکمل کرنے کے اعلان کے بعد ڈالر انڈیکس معمولی کمی کے ساتھ 99.903 پر آ گیا۔