ڈالر کے مقابلے روپے کی قدر میں معمولی اضافہ

انٹربینک مارکیٹ میں بدھ کو ڈالر کے مقابلے روپے کی قدر میں معمولی اضافہ ریکارڈ کیا گیا۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ ایک پیسے کی معمولی بہتری سے 278.56 روپے پر بند ہوا۔

یاد رہے کہ منگل کو مقامی کرنسی 278.57 روپے پر بند ہوئی تھی۔

دوسری جانب عالمی مارکیٹ میں امریکی ڈالر چھ ہفتوں کی بلند ترین سطح کے قریب مستحکم رہا، کیونکہ ایران جنگ کے باعث بڑھتی ہوئی مہنگائی سے نمٹنے کے لیے سرمایہ کار سود کی شرح میں ممکنہ اضافے کو ناگزیر سمجھ رہے ہیں۔ عالمی کرنسی مارکیٹ میں یورو 1.1608 ڈالر پر ٹریڈ ہوا، جو گزشتہ سیشن میں 8 اپریل کے بعد اس کی کم ترین سطح تھی۔ برطانوی پاؤنڈ بھی 1.3398 ڈالر پر رہا، جو اس ہفتے کے آغاز میں دیکھی گئی چھ ہفتوں کی کم ترین سطح کے قریب ہے۔

عالمی خطرات کو ناپنے کا پیمانہ سمجھے جانے والا آسٹریلین ڈالر 0.14 فیصد کمی کے ساتھ 0.7097 ڈالر جبکہ نیوزی لینڈ ڈالر 0.24 فیصد گراوٹ کے ساتھ 0.5822 ڈالر پر آگیا۔ دنیا کی چھ بڑی کرنسیوں کے مقابلے میں ڈالر انڈیکس 99.306 پر مستحکم رہا۔ مئی کے مہینے میں اس انڈیکس میں 1 فیصد سے زائد اضافہ ریکارڈ کیا گیا، جس کی وجہ ڈالر کی محفوظ سرمایہ کاری کے طور پر مانگ اور فیڈرل ریزرو کی جانب سے سال کے آخر تک شرح سود بڑھانے کے امکانات ہیں۔

مزید برآں بدھ کو خام تیل کی قیمتوں میں بھی تقریباً 1 فیصد کی کمی دیکھی گئی۔ عالمی مارکیٹ میں برینٹ کروڈ آئل کے سودے 1.11 ڈالر یا 1.0 فیصد کی کمی کے ساتھ 110.17 ڈالر فی بیرل جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) کے سودے 1.12 ڈالر یا 1.1 فیصد کی گراوٹ کے ساتھ 103.03 ڈالر پر آگئے۔