ڈالر کے مقابلے میں روپیہ مزید مضبوط

انٹربینک مارکیٹ میں پیر کو ڈالر کے مقابلے روپے کی قدر میں اضافے کا سلسلہ جاری ہے۔

اسٹیٹ بینک کے مطابق کاروبار کے اختتام پر ڈالر کے مقابلے میں روپیہ 3 پیسے کی بہتری سے 278.67 روپے پر بند ہوا۔

یاد رہے کہ جمعہ کو مقامی کرنسی 278.70 روپے پر بند ہوئی تھی۔

علاوہ ازیں پیر کو ایشیائی تجارت کے دوران امریکی ڈالر نے اپنی بڑی حریف کرنسیوں کے مقابلے میں مسلسل دوسرے دن بھی اپنی برتری برقرار رکھی۔

یورو 0.2 فیصد کمی کے ساتھ 1.1757 ڈالر پر آگیا، ین 0.3 فیصد گر کر 157.155 ین فی ڈالر رہا جب کہ برطانوی پاؤنڈ 0.3 فیصد کمی کے بعد 1.3590 ڈالر پر ٹریڈ ہوا۔

اسی طرح مارکیٹ کے حالات سے متاثر ہونے والا آسٹریلوی ڈالر 0.2 فیصد گر کر 0.7229 ڈالر پر آگیا جبکہ نیوزی لینڈ کا کرنسی یونٹ (کیوی) 0.3 فیصد کمزور ہو کر 0.5948 ڈالر کی سطح پر رہا۔ مزید برآں پیر کو ایشیائی تجارت کے دوران اپنی بڑی حریف کرنسیوں کے مقابلے میں امریکی ڈالر کی قدر میں مسلسل دوسرے دن اضافہ دیکھا گیا۔

اس دوران پیر کو تیل کی قیمتوں میں اضافہ دیکھا گیا جو صدر ڈونلڈ ٹرمپ کے اس بیان کے ایک دن بعد سامنے آیا جس میں انہوں نے امریکی امن تجویز پر ایران کے ردعمل کو ناقابلِ قبول قرار دیا تھا۔ اس صورتحال نے سپلائی کے حوالے سے خدشات بڑھا دیے کیونکہ آبنائے ہرمز بدستور بند ہے جس کی وجہ سے عالمی مارکیٹ میں تیل کی قلت برقرار ہے۔

برینٹ کروڈ کے سودے 2.70 ڈالر یا 2.67 فیصد اضافے کے ساتھ 103.99 ڈالر فی بیرل پر پہنچ گئے۔ امریکی ویسٹ ٹیکساس انٹرمیڈیٹ 2.24 ڈالر یا 2.35 فیصد اضافے کے ساتھ 97.66 ڈالر فی بیرل پر رہا۔ اس سے قبل سیشن کے دوران ان کی قیمتیں بالترتیب 105.99 ڈالر اور 100.37 ڈالر فی بیرل تک بھی چلی گئی تھیں۔