اے آئی کی بدولت نوکیا کے منافع اور فروخت میں توقع سے زیادہ اضافہ

نوکیا نے جمعرات کو اپنے سہ ماہی آپریٹنگ منافع میں توقع سے زیادہ اضافہ ریکارڈ کیا۔

کمپنی کو آرٹیفیشل انٹیلی جنس (اے آئی) اور کلاؤڈ صارفین کی جانب سے مسلسل مانگ کا سامنا ہے جس کی بدولت کمپنی نے 1 ارب یورو (1.2 ارب ڈالر) مالیت کے آرڈرز حاصل کیے ہیں۔

سال 2026 کی پہلی سہ ماہی میں کمپنی کا آپریٹنگ منافع 54 فیصد اضافے کے ساتھ 281 ملین یورو تک پہنچ گیا جو کہ ان فرنٹ کے تجزیہ کاروں کے اوسط تخمینے (250 ملین یورو) سے کہیں زیادہ ہے۔

حالیہ سہ ماہیوں میں نوکیا کی فروخت میں نمایاں اضافہ ہوا ہے جس کی وجہ نام نہاد ہائپر اسکیلرز (بڑے کلاؤڈ سروس فراہم کنندگان) کی جانب سے بنائے گئے آرٹیفیشل انٹیلی جنس ڈیٹا سینٹرز کی زیادہ مانگ ہے جو فائبر آپٹک کیبلز پر انحصار کرتے ہیں۔

فن لینڈ کی یہ کمپنی جو پہلے اپنے مشہور فون کاروبار اور بعد میں فائیو جی گیئر بنانے کے لیے جانی جاتی تھی، اب امریکی کمپنی انفینیرا کو خریدنے کے بعد آپٹیکل ٹرانسپورٹ سسٹم بنانے والی دنیا کی صفِ اول کی کمپنیوں میں شامل ہوگئی ہے۔

سہ ماہی کے دوران کمپنی کی خالص فروخت 4.5 ارب یورو تک پہنچ گئی جو کہ مارکیٹ کے تخمینوں کے عین مطابق ہے۔ فن لینڈ کے شہر ایسپو میں قائم اس گروپ کا کہنا ہے کہ آرٹیفیشل انٹیلی جنس اور کلاؤڈ صارفین سے حاصل ہونے والی خالص فروخت میں 49 فیصد اضافہ ہوا ہے۔