یونین برلن نے میری لوئس ایٹا کو بنڈس لیگا کی پہلی خاتون ہیڈ کوچ مقرر کر دیا

بنڈس لیگا کلب یونین برلن نے اعلان کیا ہے کہ اسٹیفن باؤمگارٹ کی برطرفی کے بعد میری لوئس ایٹا کو سیزن کے اختتام تک عبوری کوچ مقرر کر دیا گیا ہے۔ 34 سالہ ایٹا جرمنی کی ٹاپ فلائٹ فٹ بال لیگ (بنڈس لیگا) کی پہلی خاتون ہیڈ کوچ بن جائیں گی۔

جرمن دارالحکومت کے اس کلب نے ہفتے کو ایف سی ہائیڈن ہائیم کے خلاف 3-1 سے شکست کے بعد باؤمگارٹ سے راہیں جدا کر لی تھیں، اس شکست کے بعد یونین برلن پوائنٹس ٹیبل پر 11 ویں نمبر پر آگئی ہے۔

ایٹا نے ایک بیان میں کہا بنڈس لیگا میں ہماری جگہ ابھی محفوظ نہیں ہے۔ میں خوش ہوں کہ کلب نے مجھے اس چیلنجنگ کام کے لیے منتخب کیا ہے۔انہوں نے مزید کہا کہ یونین برلن کی طاقت ہمیشہ سے ایسی صورتحال میں متحد ہونا رہی ہے اور مجھے یقین ہے کہ ہم ٹیم کے ساتھ مل کر اہم پوائنٹس حاصل کرنے میں کامیاب ہو جائیں گے۔

ایٹا اس سے قبل یونین برلن کی انڈر 19 ٹیم کی کوچنگ کر رہی تھیں اور اگلے سیزن سے وہ کلب کی خواتین کی ٹیم کا چارج سنبھالیں گی۔

واضح رہے کہ وہ 2023 میں یونین برلن کے ساتھ جرمن ٹاپ فلائٹ کی پہلی خاتون اسسٹنٹ کوچ بننے کا اعزاز بھی حاصل کر چکی ہیں۔

یونین برلن کا اگلا مقابلہ ہفتے کے روز وولفسبرگ سے ہوگا، جو ریلیگیشن (لیگ سے باہر ہونے) کے خطرے سے دوچار ہے۔