ڈالر کے مقابلے روپیہ مزید مضبوط

انٹربینک مارکیٹ میں جمعہ کو ڈالر کے مقابلے روپے کی قدر میں معمولی اضافہ ریکارڈ کیا گیا۔

کاروبار کے اختتام پر ڈالر کے مقابلے میں روپیہ 3 پیسے کی بہتری سے 279.17 روپے پر بند ہوا۔

یاد رہے کہ جمعرات کو مقامی کرنسی 279.20 روپے پر بند ہوئی تھی۔

مشرقِ وسطیٰ میں جاری شدید جنگ اور کشیدگی کم ہونے کے امکانات معدوم ہونے کے باعث سرمایہ کاروں نے محفوظ پناہ گاہ تلاش کرنا شروع کر دی ہے، جس کی وجہ سے جمعہ کو ڈالر کئی ماہ کی بلند ترین سطح کی جانب بڑھ گیا۔

دوسری جانب جاپانی ین کی قدر گر کر فی ڈالر 160 کی سطح کے قریب پہنچ گئی اور یہ 159.61 پر ٹریڈ ہوتا رہا۔ اسی طرح یورو کی قدر میں 0.03 فیصد کمی دیکھی گئی اور یہ 1.1525 ڈالر پر رہا، جبکہ برطانوی پاؤنڈ 0.05 فیصد کمی کے ساتھ 1.3325 ڈالر پر آگیا۔

عالمی کرنسیوں کے مقابلے میں ڈالر انڈیکس معمولی اضافے کے ساتھ 99.93 پر رہا۔ مجموعی طور پر اس ماہ ڈالر کی قدر میں 2.3 فیصد اضافے کا امکان ہے جو گزشتہ سال جولائی کے بعد سے اس کا سب سے بڑا ماہانہ اضافہ ہوگا۔