حکومت نے قیمتوں میں فرق کے دعووں کے تصفیہ کے لیے اوگرا کو 27 ارب روپے جاری کر دیے
- یہ رقم وزیرِاعظم کے کفایت شعاری فنڈ سے پہلی قسط کے طور پر جاری کی گئی ہے
وفاقی حکومت نے عالمی منڈی میں تیل کی قیمتوں میں اضافے کے اثرات سے صارفین کو بچانے کے لیے بقایا پرائس ڈیفرینشل کلیمز کی ادائیگی کی مد میں آئل اینڈ گیس ریگولیٹری اتھارٹی (اوگرا) کو 27 ارب روپے جاری کر دیے ہیں۔
وزارتِ خزانہ کی جانب سے جاری اعلامیے کے مطابق یہ رقم وزیرِاعظم کی ہدایت پر وزیراعظم کے کفایت شعاری فنڈ سے پہلی قسط کے طور پر فراہم کی گئی ہے۔
پرائس ڈیفرینشل کلیمز اس حکومتی پالیسی کے باعث پیدا ہوئے، جس کے تحت عالمی سطح پر قیمتوں میں اضافے کے باوجود ملکی سطح پر پیٹرولیم مصنوعات کی قیمتیں کم رکھی گئیں تاکہ عوام کو ریلیف فراہم کیا جا سکے۔
حکام کے مطابق یہ فنڈز وفاقی حکومت کی سطح پر کیے گئے مختلف اخراجات میں کمی کے اقدامات کے ذریعے جمع کیے گئے اور بعد ازاں وزیراعظم کے کفایت شعاری فنڈ میں منتقل کیے گئے۔
حکومت شہریوں کو ریلیف کی فراہمی جاری رکھتے ہوئے مالیاتی نظم و ضبط اور بجٹ حدود کی پابندی یقینی بنانے کے لیے مزید کفایت شعاری اقدامات پر بھی سنجیدگی سے غور کر رہی ہے۔
اس اقدام سے آئل سیکٹر سے وابستہ فریقین کو سہارا ملنے اور ملک بھر میں پیٹرولیم مصنوعات کی بلا تعطل فراہمی یقینی بنانے میں مدد ملنے کی توقع ہے۔
Comments